Búgin osy máselege oraı brıfıng ótkizgen oblys ákiminiń orynbasary Naýryzbaı Baıqadamov indettiń taraýy sol baıaǵy enjarlyǵymyzdan ekenin aıtyp ótti. Mysaly, óńirimizden syrtta oqyp jatqan 8 myńǵa jýyq stýdenttiń tizimi jasalyp, emhanalarǵa taratylǵan. Jastar elge kelgen soń sol emhanaǵa tirkelýi tıis bolatyn. Biraq, kópshiligi bul talapty oryndamaǵan. Ony áke-sheshesi de baqylaýdan tys qaldyrǵan.
Mysaly, búgingi derekte mıllonǵa jýyq turǵyny bar Shymkent qalasynda 27 derek tirkelse, Qyzylorda oblysynyń bir ǵana Shıeli aýdanynda anyqtalǵandar sany 52 bolyp otyr. Onyń 43-i bir aýyldyń turǵyndary.
Tótenshe jaǵdaı bastalǵaly beri bıýdjetten, túrli rezervterden qarjy bólinip, medısınalyq jabdyqtar men azyq-túlik qoryn jasaqtaý úzdiksiz júrgizilip jatyr. Odan bólek 3790 otbasyǵa 42 mıllıon teńgege jýyq qaıyrymdylyq kómek kórsetildi. Mundaı qoldaý alda da jalǵasyn tabady. Osynyń barlyǵy eldiń amandyǵy úshin jasalyp jatqan sharalar.
– Dál osy sátte oblysta indetke shaldyqqandar 92-ge jetip otyr. Dert beleń alyp ketpeýi úshin barlyǵyn jasap jatyrmyz. Osy kúnge deıin 2 mıllıon 432 myń sharshy metr aýmaq zalalsyzdandyrylyp, basqa da shekteý sharalary qolǵa alyndy. Oblys aýmaǵyndaǵy 35 tosqaýyl beketinde az kúnniń ishinde tótenshe jaǵdaı tártibin buzǵan 201 oqıǵa anyqtaldy. Bul bizdiń azamattardyń áli de eskertýdi elemeı jatqanyn kórsetedi, – dedi oblys ákiminiń orynbasary.
