Oblys aýrýhanalary úshin «SaryarqaAvtoProm» búginge deıin 39 avtokólik qurastyrǵan, kelisimshart boıynsha qalǵan 41 kólik sáýir aıynyń sońyna deıin daıyn bolady.
Búgin Qostanaıda aýdandyq aýrýhana júrgizýshileri aımaq basshysynyń qolynan 15 sanıtarlyq avtokóliktiń kiltin aldy.
– Medısınalyq uıymdardyń materıaldyq-tehnıkalyq bazasyn jaqsartý halyqqa ýaqytyly jáne sapaly kómek kórsetýge múmkindik beredi. Sońǵy 3 jyl ishinde oblystyq bıýdjet esebinen 783 mln teńgege 30 sanıtarlyq avtokólik, 17 reanımobıl satyp alyndy. Munyń syrtynda, mine, 80 sanıtarlyq avtokólikke qol jetkizip jatyrymyz. Kólikterdiń basym bóligi shalǵaı aýdandarǵa jiberiledi. Qazir oblysta koronavırýstyq ınfeksııanyń taralýyna jol bermeý boıynsha belsendi jumys atqarylyp jatyr. Jergilikti bıýdjetten medısınalyq jabdyqtar, dezınfeksııalyq quraldar, qorǵanysh kombınezondary, maskalar satyp alýǵa 2,1 mlrd teńge bólindi. 60 tósek janyna qoıylatyn monıtor, 40 ókpege aýa jibergish qurylǵy, 20 larıngoskop, 20 defıbrıllıator, qan quramyndaǵy gazdy anyqtaıtyn 2 analızator, 20 hırýrgııalyq sorǵysh satyp alýǵa kelisim-sharttar jasaldy. Sondaı-aq 11 myń qorǵanysh kombınezony, 3,5 myń qorǵanysh kózildirigi, 800 dezınfeksııalaý quraly, maska satyp alyndy, - dedi Arhımed Muhambetov.
Sonymen qatar, oblysqa memlekettik rezerv qarajatynan bólingen 535 mln teńgege jeke qorǵanysh quraldary satyp alynady.
Qostanaı oblysy
