«Erteń, ıaǵnı sáýirdiń 10-y kúni Túrki Keńesiniń memleket basshylary «COVID-19» pandemııasyna qarsy kúreske arnalǵan beınekonferensııa ótkizedi. Atalǵan beınejıynǵa Qazaqstan Prezıdenti Qasym-Jomart Kemeluly da qatysatynyn rastady. Sondaı-aq Túrki Keńesiniń qazirgi Tóraǵasy, Ázerbaıjan Respýblıkasynyń Prezıdenti Ilham Álıevtiń bastamasymen shaqyrylǵan bul Sammıtke Qyrǵyz Respýblıkasynyń Prezıdenti Sooronbaı Jeenbekov, Túrik Respýblıkasynyń Prezıdenti Redjep Taııp Erdoǵan, О́zbekstan Respýblıkasynyń Prezıdenti Shavkat Mırzııoev, Túrikmenstan Prezıdenti Gýrbangýly Berdimuhamedov, Majarstan Premer-mınıstri Vıktor Orban jáne Túrki Keńesiniń Bas hatshysy Baǵdad Ámireev qatysady. Beınekonferensııada Dúnıejúzilik densaýlyq saqtaý uıymynyń Bas dırektory doktor Tedros Adhanom Gebreıesýs ta bolady.
Sammıtte memleketter basshylary koronavırýs indetine qarsy kúreske ulttyq deńgeıde qabyldanǵan sharalar, densaýlyq saqtaý salasynda kópjaqty yntymaqtastyqty damytý jáne óńirde «COVID-19» indetiniń órshýin týyndatqan ortaq máselelerdi sheshý týraly pikir almasady.
Olar koronavırýstyń ulttyq jáne álemdik ekonomıkaǵa teris áserin joıý joldaryn talqylap, daǵdarys ýaqytynda jáne pandemııadan keıingi kezeńde saýda ekonomıkalyq qatynastardy jalǵastyrý jáne kedergisiz tasymaldaýdy qamtamasyz etý úshin bolashaqta birlesken kúsh-jiger men ortaq sharalardy qabyldaý máseleleri tóńireginde pikir almasady.
Sammıt sońynda memleketter basshylary birlesken Deklarasııasyn qabyldaıdy»,- dep jazdy Berik Ýálı.
