Búgingi kúni ESQ kómegimen barlyq memlekettik qyzmetterdiń 80% alýǵa bolady. Sondyqtan azamattarǵa yńǵaıly bolý úshin jaqynda elektrondyq sıfrlyq qoltańbany (ESQ) onlaın alý servısi iske qosyldy. Karantınge baılanysty kóptegen azamattar memlekettik qyzmetterdi úıde alý úshin mobıldik azamattar bazasynda tirkelýi nemese ESQ-sy bolýy tıis. Al tirkelgende olardyń sáıkestendirý rásimin rastaý úshin Almatyda 50 operator jumys isteıdi. Eger azamattyń telefon nómiri mobıldik azamattar bazasynda tirkelmegen jaǵdaıda, júıe ony HQKO operatorymen baılanystyryp, ol azamatty beınebaılanys arqyly sáıkestendiredi. Bul baǵytta jelige baılanysqa shyqqan azamat birqatar qosymsha suraqtarǵa (qujattardyń derekterin, tirkeý ornyn jáne t. b.) jaýap berýi tıis.
«Qazirgi kúni qońyraýlar óte kóp túsip jatyr. Keı kezde klıenttiń jumysyn tolyqtaı óziń jasap berýge týra keledi. Qyzyqty jaǵdaılar da bolyp jatady. Bir-eki kún buryn Dyshybaev Muhıt degen bir tanysym vıdeo qońyraýmen habarlasyp, maǵan tústi. Muhıt óziniń ákesin Mgov mobile-ǵa tirkegeli júgingen eken. Ol keńes berip otyrǵan meni kórip tańdanysyn jasyrmady. Kameranyń aldynda ákesimen birge otyryp, beınebaılanysta boldyq. Biz úshin mundaı jaǵdaıda tildesý qyzyqty boldy. Ákesin tirkep rıza bolǵan ol, kórsetilgen qyzmetke alǵysyn bildirdi», - deıdi Alataý aýdandyq front-ofısiniń mamany Qalamqas Irgebaeva.
Taǵy bir beınebaılanys operatory Jansaıa Qatkenova, 2016 jyldan beri Jetisý aýdandyq front-ofısiniń mamany bolyp jumys istep keledi. Eki balanyń anasy. Mektep jasyndaǵy balalary búginde Shelek aýylyndaǵy atasy men ájesiniń janynda, sabaqtaryn qashyqtan oqyp júr. Al joldasy Almaty qalasynyń IID-niń aǵa tergeýshisi. Karantın kezinde ol da kúsheıtilgen rejımde jumys isteýde. Jansaıa úı rejımindegi jumysqa kóshken. Ol beıne qońyraý operatorynyń mindetterine tolyǵymen beıimdelip alǵan. Suraǵyna jaýap izdep, telefon shalǵan azamattardyń údesinen shyǵýǵa tyrysatyn J.Qatkenova kúnine 120-150 ótinish qabyldaıtyndyǵyn aıtady.
ALMATY
