«Elbasy óz maqalasynda ǵulama Abaıdyń, batyr babamyz Baýyrjan Momyshulynyń, ult uıtqysy, jurt birliginiń altyn qazyǵy bolǵan dara danyshpandarymyz – Áıteke bıdiń, qaz daýysty Qazybek bı men Tóle bıdiń danalyq sózderin keltire otyryp, halyqty osyndaı qıyn kezde sabyrlyq saqtap, birlikte bolýǵa úndedi. Bul maqalada alty qurlyqty álekke salǵan, maıdansyz jaýdaı jaǵadan alǵan qasiretti dertke izgilikpen, shydamdylyqpen, aýyzbirshilikpen, adamgershilik is-áreketpen judyryqtaı jumylýǵa, bir bilek, aq tilekke uıysýǵa shaqyrdy.
Halqymyzdyń ótken ǵasyrdaǵy ómirine nazar salyp, kóz júgirtetin bolsaq, budan da qıyn, budan da úreıli sátterdi basynan ótkizgenin, talaı qyp-qyzyl qyrǵynnan, qýǵyn-súrginnen, asharshylyqtan, soǵystan aman shyqqanyn tarıh betterinen oqyǵanbyz. Sol qıyn sátterdi aldyńǵy aǵa urpaq biledi, kóz aldynan ótkizdi. Syn saǵattan alyp shyqqan babalarymyzdyń bereke-birligi bolatyn. Osy jolǵy jaısyzdyq pen jaıylǵan derttiń qyspaǵynan da memlekettiń kúshi, halyqtyń birliginiń arqasynda qutylyp shyǵatynymyzǵa seneıik.
Elbasymyz osyndaı aýyr kezeńde barlyq qazaqstandyqtardy el prezıdenti Qasym-Jomart Toqaev pen Úkimet tarapynan iske asyrylyp jatqan shuǵyl sharalardy qoldaýǵa shaqyrdy. Bul tyǵyryqtan shyǵýǵa Memleket bar kúshti iske qosqanyn, birde bir kómekke muqtaj jan nazardan tys qalmaıtynyn Prezıdent Qasym-Jomart Toqaev ótken aptada halyqqa málimdemesinde aıtyp, daǵdarystan shyǵý jospary qabyldandy. Osy jospardyń iske asýyna bar kúsh-jigerimizdi salyp, bilim men biliktiligimizdi tanytyp, jedel ári ret-retimen júzege asyrý bizdiń memlekettik qyzmetker retindegi mindetimiz. Pandemııa men jahandyq ekonomıkadaǵy qubylystar qos búıirden qysqan tusta ortaq maqsatqa jumylýdyń úlgisin kórsetip, halyqtyń janynda bolyp, aqyl-keńesin aıtyp jatqan Elbasyna, birlikke shaqyrǵan aqyn-jazýshylarǵa, ásirese aldyńǵy tolqyn abzal aǵalarǵa, ataly sózin, bataly tilegin arnaǵan barsha Qazaqstan halqyna ujymnyń atynan alǵysymyzdy jetkizgim keledi. Sondaı-aq osy kúnderi tikesinen tik turyp, tynbaı eńbek etip júrgen densaýlyq saqtaý salasynyń mamandaryna, kúndi túnge jalǵap qyzmet etip jatqan atqa miner azamattarǵa amandyq tileımiz! Biz birgemiz, qıyndyqty jeńemiz» dep jazdy mınıstr.
