Aýyrǵandar sany alpystan asty
Búgin Qaraǵandy oblysynda taǵy bir adamnyń COVID-19 juqtyrǵany belgili boldy. Bul naýqas ókpesine sýyq tıip, pýlmonologııalyq gospıtalǵa jatqyzylǵan eken. Keıin zerthanalyq negizde onyń qan taldaýynan koronavırýs ınfeksııasynyń belgisi anyqtalǵan. Naýqas buryn COVID-19 juqtyrǵandarmen baılanysta bolmaǵan.
Qazirgi tańda oblysta koronavırýs juqtyrǵandar indetke qarsy qaýipsizdiktiń qajetti sharalary saqtala otyrylyp, arnaıy bokstarǵa oqshaýlandyrylǵan. Olar tıisti em-domdy alyp jatyr.
Búgingi kúnde Qaraǵandy oblysynda koronavırýs ınfeksııasyn juqtyrǵandardyń sany 62-ge jetti. Bir adam osy dertten qaıtys boldy. Úı karantıninde 1 638 adam otyr. Táýlik boıy baqylaýǵa 686 turǵyn alynǵan.
Dárigerler demeýden taryqpasyn!
Qaraǵandy oblysynda koronavırýspen kúreste aldyńǵy shepte júrgen juqpaly provızorlyq jáne karantındik gospıtaldardyń, jedel medısınalyq kómek qyzmetiniń mamandary jáne karantındik blok-beketterdegi kezekshi dárigerler ústeme aqy aldy.
Naqty aıtqanda, 1349 medısınalyq qyzmetkerge respýblıkalyq bıýdjetten ústeme tólendi. Bul maqsatqa 139 mıllıon teńge bólingen bolatyn. Syıaqy mólsheri saǵattardyń sanyna jáne qyzmetkerdiń biliktiligine baılanysty bólindi.
Sonymen qatar, oblystyq bıýdjetten bólingen 197 mıllıon teńge esebinen 1677 medısınalyq qyzmetkerge bir eńbekaqy kóleminde qosymsha syıaqy tólendi.
Jalpy, elimiz boıynsha mundaı ústemeaqyny 30 myńnan astam medısına qyzmetkeri alady.
Shahtınskide karantın kúsheıtiledi
Qaraǵandyǵa seriktes qala Shahtınskide 12 sáýir kúni saǵat 00.00-den bastap karantın kúsheıtilip, qalaǵa kirýge jáne shyǵýǵa tyıym salynatyn boldy. Qalada jeke avtokóliktermen júrýge bolmaıdy, qoǵamdyq kólik qozǵalysy ýaqytsha toqtatyla turady. Bul týraly oblystyń bas memlekettik sanıtarlyq dárigeri Qanat Asqarov málimdedi.
– Koronavırýstyń taralýyna jol bermeý jáne turǵyndardy qorǵaý maqsatynda qosymsha sharalardy qolǵa alý qajet boldy. Shahtınskide syrqattanýshylyq kórsetkishi 10 myń turǵynǵa shaqqanda 1 adamnan keletin deńgeıden asty. Osyny eskere otyryp, qalanyń karantındik aımaǵynyń biryńǵaı perımetri belgilenetin bolady jáne jeke kóliktiń qozǵalysy tolyq toqtatylady, – dedi ol.
Sáýirdiń 11-nen 12-ne qaraǵan túni karantın kúsheıtiletin Shahtınskide belgilengen perımetr boıynsha bes blok-beket ornatylady. Qalada lombardtar men aıyrbastaý pýnktteriniń qyzmeti ýaqytsha toqtatylady.
Qaraǵandy oblysy
