Sol sııaqty dezınfeksııalyq sharalar qarqyndy túrde júrgizilip, koronavırýspen kúres sharalaryna tartylǵan tıisti mamandardy jeke qorǵanys quraldarmen úzdiksiz qamtamasyz etý jumystary jalǵastyrylady. Bul týraly búgin aýdan, qala ákimderimen, oblystyq basqarma basshylarymen ótkizilgen selektorlyq jıynda oblys ákimi Amandyq Batalov aıtty, - dep habarlaıdy Almaty oblysy ákiminiń baspasóz qyzmeti.
Keshe Prezıdent Qasym-Jomart Toqaev respýblıkalyq shtab otyrysynda eldegi tótenshe jaǵdaı rejıminiń sáýir aıynyń aıaǵyna deıin sozylǵanyn aıtyp, soǵan oraı óńirlerge birqatar tıisti tapsyrmalar bergen edi. Osyǵan baılanysty Almaty oblysynyń ákimi Amandyq Batalov búgin jıyn ótkizip, tapsyrmalardy oryndaýdaǵy mindettilikterdi talqylady.
Aldymen oblys ákimi óz orynbasarlaryna sóz berdi. Olardyń árqaısysy ózi jetekshilik etetin salalarboıynsha qysqasha baıandady. Máselen, birinshi orynbasary L. Turlashov Almaty oblysy taýly óńir bolǵandyqtan, oǵan qosa aldaǵy kúnderdiń jaýyn-shashyndy bolady degen boljamyna qaraı sý tasqynynyń aldyn alý sharalaryn baqylaýda ustaý, «Jumyspen qamtý jol kartasy» boıynsha júrgiziletin qurylys jumystarynyń daıyndyǵy, bólingen qarjyny ıgerý máseleleri týraly aıtty. О́z kezeginde oblys ákiminiń orynbasary S. Beskempirov kóktemgi egis jumystaryna beriletin nesıelerdi alýǵa qujattar daıyndaý, qant qyzylshasy tuqymyn aýdan, qalalardyń alý belsendiligi jaıly tilge tıek etti. Máselen, Aqsý, Sarqan aýdandary, Qapshaǵaı qalasynyń sharýa qojalyqtary daıyn tuqymdy alýǵa áli asyǵar emes. Bul rette oblys ákimi atalǵan aýdan, qalalardyń ákimderinen jaýap alyp, bıylǵy jyly óńirde sebiledi dep josparlanǵan 16 myń gektardyń 1 gektary da kem sebilmeýi kerektigin ákimderge qatań eskertti.
Oblys ákiminiń orynbasary S. Turdalıev azyq-túlik qaýipsizdigin qamtamasyz etý men baǵany turaqtandyrý maqsatynda atqarylyp jatqan isterge toqtaldy. Qazirgi kezde baǵany turaqtandyrý úshin kelisimshart jasasatyn saýda salasynyń 29 kásiporyny belgilengen. Sonyń ishinde «Sabyrjan» kompanııasymen kelisimshart jasalyp úlgergen. Osy oraıda Amandyq Batalov aýdan, qala ákimderine: «Kelisimshartqa otyrǵan saýda úılerine nurotandyqtarmen, qoǵamdyq uıymdarmen birge baryp kórińder, qandaı taýarlar bar, assortıment jetkilikti me, qandaı baǵamen satylyp jatyr, sonyń bárin baqylap bilip otyrýlaryń kerek. Osyndaı arnaıy sharalar qabyldanyp jatqany týraly halyqqa aıtyp, túsindirip, jetkizińder. Bir aptadan soń azyq-túlik baǵasyn retteý týraly maǵan jeke-jeke esep beresińder», - dedi.
Sol sııaqty oblystaǵy shaǵyn jáne orta bıznes nysandarynda jumys istegen azamattardy «Jumyspen qamtý jol kartasy» aıasynda jumysqa tartý máselesi de pysyqtaldy.
Oblys ákiminiń orynbasary B.Baıjumanov medısına mamandaryna ústemaqy men syıaqy berý, olardy qajetti jeke qorǵaný quraldarymen qamtý, karantındegi «Asyl Arman» turǵyn úı kesheniniń jaǵdaıy, balalardy qashyqtan oqytýdyń jaı-kúıi sııaqty birqatar máselelerdi baıandady. Oǵan qosa Qarasaı aýdanynyń ákimi Jandarbek Dalabaev «Asyl Arman» TK-da oblystyq ákimdiktiń kómegimen 983 otbasyna, aýdan óz tarapynan qosymsha 385 otbasyna kómek kórsetip, qajettiliktermen qamtamasyz etkenin jetkizdi.
Jıyn sońynda oblys ákimi tótenshe jaǵdaı rejıminiń sáýir aıynyń sońyna deıin sozylýyna baılanysty barlyq blokposttar qazirgideı kúsheıtilgen rejımde jumysyn jalǵastyrýy tıistigin aıtty.
- Ásirese Jambyl oblysymen shektesetin aýmaqtarda qatań saqtyq qajet. Indetpen kúres sharalaryna tartylǵan barlyq mamandardyń jeke qorǵaný quraldarymen tolyq kólemde úzdiksiz qamtamasyz etilýi qatań baqylaýǵa alynsyn. Artyq júris-turysty, kóshege shyǵýdy shekteý, dezınfeksııalyq sharalar odan ári jalǵasady. Egis alqaptaryndaǵy kóktemgi jumystar toqtamaıdy. «Jumyspen qamtý jol kartasynyń» jobalaryn júzege asyratyn merdiger kompanııalardyń jaýapty, sapaly bolýyna nazar aýdaryp, olardyń jumysyn keste boıynsha qatań baqylaýda ustaýymyz kerek. Eń bastysy – kartaǵa engizilgen jobalardy júzege asyrý, sol arqyly jańajumys oryndaryn ashý, qarjyny der kezinde ıgerý. Ár aýdan, qala ákimderi, sala jetekshileriniń Prezıdent júktegen mindetterdi basshylyqqa alyp jumys isteýin qatań tapsyramyn, - dedi A. Batalov.
