«Qurmetti mádenıet, sport jáne týrızm salasynyń qyzmetkerleri!
Memleket basshysy Qasym-Jomart Toqaev Tótenshe jaǵdaı jónindegi memlekettik komıssııa májilisinde «Bereke-birliktiń arqasynda Qazaqstan bul indetti artqa tastap, zor senimmen alǵa basatyny aıqyn. Búginde biz ýaqytynda júzege asqan shuǵyl sharalardyń arqasynda indettiń keń taralýyna jol bermedik» dep, elge rýhanı turǵyda qoldaý bildirip jatqan mádenıet salasynyń qyzmetkerlerine alǵys aıtty.
Jahandy jaýlaǵan qaterli indetke tosqaýyl bolýdyń tıimdi joly – oqshaýlaný, tártipke baǵyný ekenin kópshilik qazir jete túsinedi. Dárigerler, polısııa qyzmetkerleri men eriktiler kún-tún demeı elge qyzmet etýde. Bul – ortaq iske ár azamat óziniń qolynan keletin úlesin aıamaý kerek kezeń. Bul – bar adam balasy bir tilek, bir maqsatqa judyryqtaı jumylǵan ýaqyt.
Osyndaı kúnderi mádenıettiń basy-qasyndaǵy maıtalmandar, aqyn-jazýshylar men ónerdiń ár salasynda júrgen juldyzdarymyz qysqa ýaqytta halyqqa dem beretin, qyzyqty jobalardy bastap ketti.
El Prezıdenti «Qazaqtelekom» AQ birlesken YouTube arnasyndaǵy «Karantındegi juldyz» jobasy týraly jyly pikir aıtty. Budan bólek onlaın rejımde jáne taspada qanshama sporttyq jattyǵýlar, dárister, suhbattar jáne konsertterden turatyn vıdeokontent sıkly júzege asyp jatyr. Munyń bári óner qaıratkerleri men sport jáne týrızm sańlaqtarynyń halyqqa degen ıgi nıeti, ystyq yqylasy dep qabyl alǵaısyzdar.
Osy rette mádenıet jáne sport salasy qyzmetkerlerine birlik pen yntymaq tanytyp, halyqqa qoldaý jasaǵandary úshin rızashylyǵymdy bildirgim keledi. Bastamany qoldap, joǵary baǵa bergen Memleket basshysyna búkil mádenıet, sport, týrızm salasy qyzmetkerleriniń atynan zor alǵys aıtamyn.
Aldaǵy ýaqytta da el kóńilinen shyǵatyn ómirsheń jobalardy júzege asyryp, kórermenniń, tyńdarmannyń talabyn qanaǵattandyrýǵa atsalysýǵa shaqyramyn» - delingen alǵys aıtý hatynda.
