Atap aıtqanda, Nur-Sultan qalasynda – 238, Almaty qalasynda – 145, Shymkent qalasynda 38 jaǵdaı tirkelse, oblystardyń ishinde indetti eń kóp juqtyrǵan Qyzylorda oblysy (116 adam) bolyp tur. Al Aqmola oblysynda – 71, Qaraǵandy oblysynda – 65, Atyraý oblysynda – 59, Jambyl oblysynda 46 adam vırýs juqtyrsa, Túrkistan oblysynda – 36, Soltústik Qazaqstan oblysynda – 25, Aqtóbe men Almaty oblystarynda 11 naýqastan tirkeldi. Aýrýǵa shaldyqqandardyń sany Mańǵystaý oblysynda – 10, Pavlodar oblysynda – 9, Batys Qazaqstan oblysy – 8, Shyǵys Qazaqstan oblysynda – 6, Qostanaı oblysynda 3 adamǵa jetip otyr. Respýblıka boıynsha COVID-19 vırýsyn juqtyrǵandardyń 86-sy jazylyp shyqsa, 10 adam kóz jumdy.
Keshe Atyraý oblysynyń ákimdigi juqpaly aýrýlar stasıonarynan koronavırýs juqtyrǵan alǵashqy pasıentterdiń jazylyp shyqqanyn habarlady. Olar – 27 naýryzda aýrýhanaǵa jatqyzylǵan 14 jastaǵy qyz ben 19 jastaǵy jigit. Ekeýi de 14 kún boıy medısınalyq qyzmetkerlerdiń baqylaýymen úı karantıninde bolady.
Sondaı-aq Nur-Sultan qalasy ákimdiginiń janyndaǵy tótenshe jaǵdaı rejimin qamtamasyz etý jónindegi qalalyq shtab Memleket basshysynyń tapsyrmasyna sáıkes karantın sáýir aıynyń sońyna deıin uzartylatynyn habarlady. Búgin Tótenshe jaǵdaılar jónindegi memlekettik komıssııanyń otyrysynda jumysyn qaıta bastaı alatyn kásiporyndardyń naqty tizimi qaralmaq. Alaıda, jumysyn qaıta bastaıtyn nysandar qatań sanıtarlyq-epıdemııalyq rejimdi qamtamasyz etýge mindetti.
