Mıllıondaǵan adamnyń qolyn ǵana emes, ómirin jutqan ekinshi dúnıejúzilik soǵystyń aýqymy da koronavırýs sekildi jer júzin túgel qamtı almap edi. Bizdiń urpaq estimegen náýbet jerdegi pendeniń barlyǵyn bir tarynyń qaýyzyna syıǵyzyp, bir ýys etti. Jer-ana býsanyp, qym-qýyt jumystyń bastalar kezinde aıaqqa tusaý salynǵandaı, jurt qamalyp úıde otyr. Áıteýir tyǵyryqtan jol taýyp turǵan ınternet pen telefon ǵana. Oqyrmandary, qalamdastary, joldas-jora, aǵaıyn-jekjaty aqyndy týǵan kúnimen, mereı jasymen japyrlaı quttyqtap jatty. «Serikbaı aǵa, jasaı berińiz! Qalamyńyz talmasyn!» degen tilekter jyldaǵydaı aqyn dastarqanynyń basynda nemese oǵan qurmet kórsetiletin kezdesýlerde aıtylmaı, áleýmettik jelilerde tizbektele jazyldy. Osyndaı tilekti aıtqan biz de, telefonnyń ar jaǵyndaǵy aqynǵa:
– Serikbaı aǵa, karantın bolǵaly úıde nemen aınalystyńyz? Jazý shyǵar? – deımiz.
– Iá, jazý qalmaıdy ǵoı. Biraq men onyń syrtynda besik jasap jatyrmyn. Úıde otyrǵaly alty besik jasap qoıdym, – deıdi Serikbaı aǵa.
Qazaq ádebıetine lırıkalyq poezııasymen salym salǵan, al sońǵy jyldary Ybyraı Altynsarındi zerttep, ybyraıtanýǵa súbeli úles qosyp júrgen Serikbaı Ospanulyn jurt qolóner sheberi retinde de jaqsy biledi. Ákesi Ospannan daryǵan ónerdi Serikbaı aǵaı ógeısitken emes. Ol jasaǵan dombyra, sandyq, ústel, taǵy basqa buıymdar sulýlyǵymen erekshelenedi. Búgin de ózi turatyn jer úıdiń aýlasyndaǵy kúnshýaqta otyryp, besik jasaıdy. Aqynnyń osy joly ulttyq naqyshpen kómkerilgen qasıetti besik jasaýdy qolyna alýy kezdeısoq emes sekildi.
– Koronavırýsqa osylaı qarsylasyp jatyrmyz, – dep qoıady aqyn bizdiń oıymyzdy oqyǵandaı. – Sumdyq-aı, úıge adam kelmeıdi, ózimiz úıden shyqpaımyz. Habarlasqandar arasynda úıde jatyp, ishi pysqandar da barshylyq sekildi. Qarap otyrý ózim úshin qıyn is. Meni jazýdan demaldyratyn da, sharshaǵanymdy basatyn da osy qolónerim.
Onyń jasaǵan buıymdaryn suraýshylar da jetkilikti. El ishi emes pe, sandyq ta, dombyra da kóp kúttirmeı, ıesin taýyp ketedi. Biraq osy joly oǵan besik úshin eshkim aldyn ala suranys bermepti. О́zi jasap, qaz-qatar qoıyp jatyr. Qazaqtyń basynan qandaı náýbet ótpedi? Halqymyzdyń qynadaı qyrylǵan kezi tarıhta az emes. Torǵaı óńirinde balaǵa shyǵatyn qyzylshadan úı bosap qalǵan kezder de bolǵan eken. Onyń shet-jaǵasyn aqynnyń ózi de biledi. «Qansha náýbet bolsa da, kelinder besik terbetsin, el irgesi aman bolsyn» degen tilekpen qasıetti besik jasaýdy qolyna aldy-aý» dep aqynnyń oıyn biz de oqyǵandaı boldyq. Sheberdiń qolynan shyqqan buıym jerde qalmaıdy dedik. Jaqsy yrym ekenin aıtsaıshy!..
Názıra JÁRIMBET
QOSTANAI
