Memleket basshysy, Qazaqstan Qarýly Kúshteriniń Bas qolbasshysy Qasym-Jomart Toqaevtyń Jarlyǵyn oryndaý maqsatynda Batys Qazaqstan oblysynda da daıyndyq jumystary atqarylýda. Memleket basshysynyń shaqyrýyn aqjaıyqtyqtar qyzý qoldady. Jarlyq shyqqan kúnnen beri 300-ge jýyq batysqazaqstandyq azamat óz erkimen arnaýly jıynǵa barýǵa ótinish bildirdi.
Shaqyrylatyn áskerı mindettilerdiń sanyn jáne arnaýly jıyndardy ótkizý merzimin ár óńirdiń ishki qajettiligine qaraı jergilikti atqarýshy oryndar sheshedi. Áskerı mindettilerdi arnaıy jıynǵa shaqyrý úsh aıǵa deıin sozylýy múmkin. Qazirgi tańda tıisti qujattar daıyndalýda.
Arnaýly jıyndarǵa alynýshylar oblys aýmaǵynda tótenshe jaǵdaı talaptaryn saqtaýǵa, zararsyzdandyrý sharalaryn ótkizýge, blok-beketterde jáne qala ishinde patrýldik kezekshilik atqarýǵa jumyldyrylatyn bolady. Sondyqtan ótinish bildirýshilerdiń ishinde buryn zararsyzdandyrý jumystaryna qatysy bar mamandarǵa, medısınalyq salada jumys istegenderge, Ulttyq ulanda, qalalyq patrýlde áskerı qyzmetin ótegenderge kóńil bólemiz. Árıne nıet bildirgender komıssııadan ótse ǵana áskerı qyzmetke qabyldanady. Olar Qazaqstan Qarýly Kúshteri qataryna engizilgennen keıin «Áskerı qyzmet jáne áskerı qyzmetshi týraly» zańyna sáıkes áleýmettik sıpattaǵy barlyq jeńildikti paıdalanady.
Jaqynda ǵana Qapshaǵaı garnızonynan 150 áskerı qyzmetshi Oral qalasyna ákelindi. Olar birden oblys ortalyǵynda dezınfeksııalyq sharalardy atqarýǵa atsalysty. Qazir qala men oblys aýmaǵyndaǵy blok-beketterge, qala ishindegi patrýldik kúzetke kómektesip jatyr. Jaǵdaı tolyq baqylaýda.
Otan qorǵaý – Qazaqstan Respýblıkasynyń ár azamatynyń abyroıly boryshy. Sonyń ishinde el basyna kún týǵan sátte, búkil álemdi ábigerge salǵan koronavırýs indetimen kúreste áskerı mindetti azamattar óz erkimen aldyńǵy shepke shyǵýy zańdy. Sondyqtan arnaýly jıyndardyń qurylýy – tek qajettilikten týǵan másele emes, patrıottyq shara dep esepteımin. Bul bizdiń birligimizdi, otanshyldyǵymyzdy kórsetedi. Biz bir bolsaq, kez kelgen qıyndyqty jeńip shyǵatynymyz anyq.
Maqsat MUQANOV,
polkovnık, Batys Qazaqstan oblysy ákiminiń áskerı qaýipsizdik jáne qorǵanys máseleleri jónindegi kómekshisi
