Kári qurlyqta Rýbıkon degen ózen bar, b.z.b. 49 jyly Sezar keship ótken. Qaıta jol basyna kelmeske, keri aınalmasqa, kezeńdi qaıta ótkermeske bekingen jannyń táýekeli - «Rýbıkondy keship ótý».
Biz de óz Rýbıkonymyzdy keship ótip kelemiz. Vırýs barmaǵan birli-jarym el, birneshe aral ǵana qaldy. Elimizde qalalardy qoıa turǵanda, tutas aýyldar karantın «tutqynyna» aınaldy. Kúsheıtilgen karantın rejimi kelesi kezeńine uzartyldy.
Álemniń óz Rýbıkonyn keship ótip bara jatqany oıyma fılosof Vladımır Solovevtiń «ózenin» saldy.
Myna nurly dúnıede armany – bala qýǵan batpyraýyqtaı shalǵaıǵa ketken, muraty men maqsaty – qarashada jolyqqan qyz júregindeı qupııaǵa aınalǵan jigit bolypty. Sharshaǵan, shaldyqqan, azap keshken, adasqan, jolsoqty bolǵan sol jigittiń aldynan bir kúni ótkel bermes ózen shyǵady. Túrken ózendi keship óterge talap ta, táýekel de joq, muzdaı sýy mıdy qursardaı, súıekti syzdatardaı, aǵyny – almaǵaıyp zamannyń aldamshy úmiti sekildi alyp qashardaı. О́z qaıǵysynyń qushaǵynda ózen boılap kele jatqan sol jigit bir kezde ózennen óte almaı qusalanyp turǵan keıýanany kóredi. Keıýana kóziniń jasy óńirin tozdyryp, arǵy bette qalǵan prezentine jete almaı turǵanyn aıtady. О́z ómirinde ózgege kórseter órnek joq, bekerge ótken, zaıa ketken kóp kúnniń óteýi nede, bálkim, osy keıýanany ózennen ótkerse, dúrııa dúnıedegi durys sheshimi sol bolar ma?!.
Osy oımen álgi jigit keıýanany arqalap, ózenge qoıyp ketedi. О́zen qaıtsin, óz degenin qylady ǵoı. Joıqyn aǵys julqa tartady, sýdyń sýyǵy súıeginen ótedi, keıýananyń zildeı salmaǵy moınyn kesip barady. Sonyń bárine tózgen jigit keń ózendi keship keledi, kesip keledi, bir sátte arqasyndaǵy júktiń jeńildeı bastaǵanyn, aǵystyń saıabyrsyǵanyn, sýyqtyń qaıtqanyn sezinedi. О́zenniń arǵy betine ótip, keıýanany túsirgende, onyń kún astyndaǵy Kúnikeıdeı kóz qanyp bolmas kórkem sulýǵa aınalyp ketkenin kóredi.
Bizdiń Rýbıkon – osy ózen sekildi, arqamyzǵa batqan osy kezeńdi arqalap ótsek, qazirgi úreı men qorqynyshqa, astamshylyq pen álimjettilikke, beı-bereket baraqatsyzdyqqa toly álemimizdiń jańa sıpattaǵy jarqyn dúnıege, ózgeshe mándi ózgeriske ushyraǵan zamanǵa, adamzat progresiniń jańa dáýirine aınalǵanyn kóremiz.
Betperde kıgen kóktem. Kóktemniń jan elitken jupar ıisi keler kórkem kúnderdiń jazǵan haty sekildi. Balanyń qolymen jazylǵan.
