Prokýratýra bir jyl buryn Atyraý qalasyndaǵy psıhonevrologııalyq aýytqýlary bar balalarǵa arnalǵan mektep-ınternattaǵy beınebaqylaý kameralaryn teksergen kezde balalardy uryp-soǵý derekteri anyqtalǵan bolatyn. Bul is jurtshylyq arasynda keńinen talqyǵa salyndy.
Degenmen, 2020 jyldyń aqpan aıynyń sońynda tárbıeshilerge qatysty qylmystyq is QPK-niń 35-babyndaǵy 1-bóliktiń 4-tarmaǵy negizinde «qylmystyq jaýaptylyqqa tartýdyń eskirý merziminiń ótýine oraı» toqtatyldy.
Bul isti erekshe baqylaýǵa alǵan Senat Tóraǵasy Darıǵa Nazarbaevanyń bastamasy boıynsha Bas prokýratýra men Ishki ister mınıstrligine hat joldanyp, tıisti depýtattyq saýaldar ázirlengen bolatyn, onda ınternat tárbıelenýshilerine qatygezdik tanytqan kinálilerdi zańǵa sáıkes qatań jazalaý talaby aıtyldy.
2020 jylǵy 12 naýryzda Atyraý oblystyq prokýratýrasy Atyraý qalasyndaǵy №3 arnaýly áleýmettik qyzmetter kórsetý ortalyǵynda múgedek balalardy soqqyǵa jyqqan tárbıeshilerge qatysty qylmystyq isti qysqartý týraly sheshimniń kúshin joıdy. Is qosymsha tergeýge qaıtaryldy.
IIM aqparaty boıynsha, qaıta tergeýden keıin tárbıeshiler men sanıtarlardyń jas tárbıelenýshilerge qatysty qatygezdik faktileri rastaldy. Sot-medısınalyq saraptamasynyń qorytyndysyna sáıkes, saraptama júrgizý kezinde ortalyqtyń úsh jas tárbıelenýshisinde 1-3 táýlik shamasynda dene jaraqatyn alǵany, densaýlyqtaryna jeńil zııan retinde saralanǵany belgili boldy.
Bıylǵy jyldyń 24 naýryzynda qylmystyq is Qylmystyq kodekstiń 110-babyndaǵy 2-bóliktiń 1,2-tarmaqtary boıynsha kámeletke tolmaǵan adamǵa nemese kináli adamǵa dármensiz kúıde ekeni kórineý belgili ne kináli adamǵa materıaldyq nemese ózgedeı táýeldi adamǵa qatysty kináni moıyndaý dep saralandy. Osy mekemeniń tárbıeshileri men sanıtarlarynyń áreketteri elimizdiń Qylmystyq kodeksiniń atalǵan babyna jatqyzylyp otyr.
Sonymen qatar, Bas prokýratýranyń aqparaty boıynsha, kináli laýazymdy tulǵalarǵa qatysty jol berilgen prosessýaldyq buzýshylyqtar úshin oblystyq polısııa departamenti bastyǵynyń orynbasaryna, tergeý basqarmasynyń bastyǵyna jáne onyń orynbasaryna, sondaı-aq anyqtaýshylarǵa qatysty tártiptik is qozǵaldy. Atyraý qalasy №3 arnaýly áleýmettik qyzmetter kórsetý ortalyǵynyń dırektory qyzmetinen bosatyldy, Atyraý oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary jáne mekeme bóliminiń basshysy tártiptik jaýapkershilikke tartyldy.
Is Darıǵa Nazarbaevanyń jeke baqylaýynda bolady.
