Ol – Keńes Odaǵynyń Batyry, tuńǵysh Halyq Qaharmany, elimizdiń tuńǵysh Qorǵanys mınıstri, Armııa generaly Saǵadat Qojahmetuly Nurmaǵambetov. Bul oı budan bir jyldaı buryn keldi. Úlken tas joldyń boıyna bılbord qoıý kerek. Aýyldy batyrdyń atyna saı bolatyndaı jaǵdaıǵa keltirý qajet. Bul úshin mádenıet úıin kúrdeli jóndeýden ótkizip, aldyna eskertkishin qoıyp, mýzeı ashý kerek. Orta mektepke qaharmannyń esimin bergen durys bolar edi. Biraq osy mekeme de kúrdeli jóndeýdi qajet etip tur. Oǵan qomaqty qarjy qajet. «Izdegenge – suraǵan» degendeı Qazaqstanda S.Q.Nurmaǵambetov atyndaǵy halyqaralyq qor bar ekenin bildim. Qordyń prezıdenti Mahmýt Nilibaev myrzaǵa jolyqtym. Ol kisi qoldaıtynyn jáne múmkindiginshe kómektesetinin aıtty. Bul qordyń ókili Qalı Qambarov ekeýmiz sol elge baryp, aýyl ákimi Saǵyndyq Abahanov úsheýmiz aýyldy kórkeıtý týraly jospar jasap, aýdan ákiminiń kelisimin alyp, oblys ákimine shyqtyq. Oblys ákimi mádenıet úıi men mektepti kúrdeli jóndeýge qarjy bólip, bul isti qandaı qurylys uıymy oryndaıtyny anyqtalýda eken. Taıaýda Aqkól aýdanynyń ákimdiginde bılbord ornatý, mýzeı ashý, mektepke batyrdyń esimin berý, bıýst jasaý t.b. máseleler qaralyp, árbir salaǵa tapsyrma berildi. Uly Jeńistiń 75 jyldyǵyna jáne «Rýhanı jańǵyrý» baǵdarlamasyna sáıkes aqkóldikter, onyń ishinde Eńbek aýyly 2020 jyldy S.Q.Nurmaǵambetov jyly dep atap otyr. Bul erdiń arýaǵyna eliniń kórsetken qurmeti jáne onymen qosa óskeleń urpaqqa patrıottyq tárbıe berýge qosylǵan zor úles der edik.
Erkin DÁÝEShOV,
Aqkól aýdanynyń qurmetti azamaty
Aqmola oblysy
