Bıylǵy baıqaýǵa qatysýshylar úshin keıbir ózgeristerdi aıta ketelik. «Jıvaıa prıroda Altaıa» ataýymen tanymal joba sońǵy jyldary keńeıe tústi. Seriktesterdiń sany artyp, jańadan nomınasııalar qosyldy. Máselen, «Jıvaıa prıroda Altaıa» X halyqaralyq fotobaıqaýy 9 atalymnan turady: «Peızaj», «Janýarlar», «О́simdikter», «Mıkroálem», «Mobıldi fotosýret», «Tiri tabıǵat vıdeosy», «Tiri tabıǵat mınýty», «Tiri tabıǵat týraly esse» jáne bonýstyq nomınasııa «Qoryqtyq Altaı». Jańadan qosylǵan «Tiri tabıǵat mınýty» atalymyna qatysýshynyń jeke Instagram paraqshasynda ornalastyrylǵan jáne #MınýtaJıvPA2020 heshtegimen belgilengen vıdeolar kiredi. Taǵy bir jańalyq, «Tiri tabıǵat týraly esse» nomınasııasy sýret avtorynyń bergen taqyryptaǵy oılary men áserlerin bildiretin shaǵyn kólemdi jáne erkin kompozısııadaǵy shyǵarma. Sonymen qatar baıqaý jumystaryn resimdeýdi jeńildetý úshin saýaldama usynyldy, ony toltyryp, tıisti túrde qol qoıylǵan fotosýretterdi qosa otyryp, konkýrsqa qatysa alasyz.
Jumystar 2020 jyldyń 1 sáýirinen 30 qyrkúıegine deıin qabyldanady. 27 qarashada Reseıdiń Barnaýyl qalasyndaǵy Altaı ádebıet tarıhy, óner jáne mádenıeti memlekettik murajaıynda úzdik jumystardyń fotokórmesiniń saltanatty ashylýy ótpek. Sondaı-aq jeńimpazdardy marapattaý 2021 jyldyń 29 qańtarynda ótedi. «Qoryqtyq Altaı» nomınasııasynyń jeńimpazy jyl fotografy jáne «Jıvaıa prıroda Altaıa – 2020» konkýrsynyń bas jeńimpazy bolyp jarııalanady.
Uıymdastyrýshylar qatarynda Altaı ádebıet tarıhy, óner jáne mádenıeti memlekettik murajaıy, Altaı Respýblıkasynyń A.V.Anohın atyndaǵy ulttyq murajaıy, «Tıgırek» memlekettik qoryǵy, «Katýn» memlekettik tabıǵı bıosferalyq qoryǵy, Altaı memlekettik tabıǵı bıosferalyq qoryǵy, «Saılıýgem» ulttyq parki jáne elimizdiń «Katonqaraǵaı memlekettik ulttyq tabıǵı parki» respýblıkalyq memlekettik mekemesi bar.
