«Barshańyzdy aman-esen kórgenime qýanyshtymyn. Búginde álemde kúrdeli jaǵdaı qalyptasyp otyr. Pandemııa kóptegen eldiń qoǵamdyq, ekonomıkalyq ómirin toqyraýǵa ushyratty.
Úkimet pandemııa kezeńinde shet elderde qalyp qoıǵan Qazaqstan azamattaryna qamqorlyq kórsetti. Charterlik ushaqtarmen jáne basqa da kólik túrlerimen elimizge 7 myńnan asa otandasymyz oraldy.
Elimizde koronavırýs indetiniń taralýy sharyqtaý shegine jetpegenin eskere otyryp, Tótenshe jaǵdaı rejımin jáne karantın sharalaryn saqtaý sáýirdiń aıaǵyna deıin sozyldy.
Búgin Joǵary eýrazııalyq ekonomıkalyq keńes Birlesken málimdeme jasaıdy. Atalǵan sharalar indettiń taralýyna qarsy kúreste jáne el ekonomıkasyn turaqtandyrýda mańyzdy qural bolmaq.
Joǵary eýrazııalyq ekonomıkalyq odaqtyń uzaq merzimdi ornyqtylyǵy saýda prosesteriniń turaqtylyǵyna tikeleı baılanysty. Qazirgi ýaqytta saýda - «tórt erkindiktiń» eń basty baǵyty.
Eýrazııalyq damý banki birlesken jobamyz bar. Bul bank daǵdarystan keıingi kezeńdegi birlesken jobalarymyzdy qarjylandyrýdyń tıimdi quraly bolýǵa tıis.
Búginde Qazaqstan koronavırýsty anyqtaıtyn test júıesin ázirlep, vaksına daıyndaýǵa kirisip ketti. Osyndaı jumys Odaqtyń basqa da elderinde júrgizilýde. Bul salada Reseıdiń de jetistigi mol.
Biz aqparat almasý, indetti anyqtaýdyń ınnovasııalyq tásilderin jáne ony emdeýdiń joldaryn ázirleý, elderimiz arasyndaǵy ǵylymı yntymaqtastyqty kúsheıtý máseleleri boıynsha ózara is-qımyldardy jandandyra túsýimiz kerek.
Memleketterimizde karantın rejıminiń engizilýine baılanysty sıfrlyq taýarlar men qyzmetterge suranys artqanyn kórip otyrmyz. Sonymen qatar sıfrlyq ınfraqurylymnyń sapasy men senimdiliginiń asa mańyzdy ekenine kóz jetkizdik.
Komıssııaǵa múshe-memleketter úkimetterimen birlesip atalǵan baǵytta yntymaqtasa jumys júrgizý úshin naqty usynystar jobasyn daıyndaýdy usynamyn», - dedi Prezıdent.
