Chapaev kentinde Maqsot pen Dına Hasanovtardy úlken-kishi jaqsy biledi. Maqsat aǵa eńbek jolyn Chapaev aýdandyq mádenıet úıinen bastaǵanda, Dına apaı avtoklýb meńgerýshisi eken. Sonaý 1973 jyly otaý kótergen ónerli jastar osydan 30 jyl buryn otbasylyq ansambl quryp, sodan beri halyq aldynda óner kórsetip keledi.
Shaǵyn ǵana otbasylyq ujymnyń qol jetkizgen jetistikteri óte kóp. 1977 jyly Qazan tóńkerisiniń 60 jyldyǵyna arnalǵan halyqaralyq festıvaldiń laýreaty atansa, 1985 jyly Uly Jeńistiń 40 jyldyǵyna arnalǵan otbasylyq ansamblder saıysynda da júldeger qatarynan kórindi. Bolgarııa, Rýmynıa elderinde, Máskeý, Kıshınev qalalarynynda ótken halyqaralyq festıvalda oblystyq «Aqjaıyq» ansambliniń quramynda óner kórsetip, talantymen talaıdy tamsandyrdy.
«Uıada ne kórseń, ushqanda sony ilesiń» demeı me? О́nerli otbasynda týǵan alty balanyń tórteýi búginde óner salasynda qyzmet etip júr. Sonyń ishinde Jańylsyn Hasanovanyń orny bólek. 1997 jyly oblystyq «Jas qanat» baıqaýynda «Álııa» ánin oryndap, júldeli I-shi oryndy jeńip alǵan Jańylsyndy aqjaıyqtyqtar «Bizdiń ánshi Rozamyz» dep atap ketti. Odan keıin de Jańylsyn talaı sahnada top jardy. Eskendir Hasanǵalıev atyndaǵy respýblıkalyq «Atameken» baıqaýynyń I oryn ıegeri, halyqaralyq «Shabyt» festıvaliniń dıplomanty atandy. 2006 jyly respýblıkalyq «Jas qanat» baıqaýynda II-shi júldeli oryndy jeńip alyp, «Kúmis qanat» belgisine ıe boldy. 2006 jyly Qazaqstan Respýblıkasy Prezıdentiniń Jarlyǵymen Qazaqstan Respýblıkasynyń Qurmet gramotasymen marapattalyp, 2012 jyly «Eren eńbegi úshin» medaline ıe boldy.
Al Jańylsynmen tete ósken Qaırat búginde mádenı-demalys ortalyǵynyń baǵdarlamashysy, halyqtyq ult-aspaptar orkestrinde daýylpazdy basqarady.
Áýlettiń besinshi perzenti Ashat Qurmanǵazy atyndaǵy Qazaq Ulttyq konservatorııasyn úzdik bitirgen óner ıesi. Qazir Batys Qazaqstan oblystyq kamerlyq orkestrinde bas dırıjer bolyp qyzmet etedi.
Al, úıdiń kenjesi Medet kezinde ata-anasy eńbek etken Jaıyq aýyldyq klýbynda kınomehanık, mýzykant bolyp qyzmet etedi. Ánshilik óneri de eshkimnen kem emes.
Mine, ónerli shańyraq karantınde qamalyp jatqan kórermenderine arnap keremet konsert joldapty. Aldymen Maqsot aǵa men Dına apaı sóz alyp, álemdi ábigerge salǵan indet kezinde qaýipsizdik saqtaý, úıde otyrý qajet ekendigin aıtyp, kórermenge sabyr men saqtyq tiledi. Odan keıin baıan únine qosylyp jergilikti sazger Raqym Janaıysovtyń «Atamekenge saǵynysh» áni áýeledi. Gıtara, kontrabas, skrıpka, dombyra aspaptary aralasqan ádemi konsertke áýlettiń kelinderi men nemereler de atsalysty. Osylaısha, otbasylyq ansambldiń otyzjyldyq mereıtoıy onlaın konsertimen este qaldy.
Batys Qazaqstan
