«Menińshe, bıyl matchtardy jalǵastyrý qıynǵa soǵatyn sııaqty. Qazir álem densaýlyǵy men oǵan daıyndyq dárejesiniń ártúrli bolýyna baılanysty halyqaralyq saparlarǵa qashan oralatynymyz belgisiz. Qyrkúıek aıynda match ótkizemiz degen jospar bar, biraq buǵan senimdi emespiz.
Sonymen qatar alǵashqy matchtardy jankúıerlersiz ótkizýdi de kózdep otyrmyz. Biraq bul óte táýekeldi qadam bolmaq. Bálkim basqa salalar sııaqty fýtbolǵa da kezeń-kezeńimen keletin shyǵarmyz. Dese de 2021 jyldyń naýryz aıyna deıin bári qalypqa keledi degen oıdamyz. Biz qazir eń bastysy ulttyq birinshilikterdi jalǵastyrýdy oılastyrýymyz kerek. Al ulttyq quramalardyń oıyndaryn keıin qarastyra beremiz», deıdi ol.
Buǵan deıin FIFA-nyń jumys toby koronavırýsqa baılanysty ulttyq quramalardyń oıyndaryn maýsymǵa deıin shegerdi. Sondaı-aq Eýropa chempıonaty men Amerıka kýbogyn kelesi jylǵa aýystyrǵan bolatyn.
Eger bıyl ulttyq quramalar match ótkizbeıtin bolsa Qazaqstan quramasy kúzde bastalatyn Ulttar lıgasy dodasyna qatysa almaıdy. Sonymen qatar ulttyq qurama osymen tarıhta úshinshi ret jyl boıy match ótkizbeýi múmkin. Elimizdiń basty quramasy eń alǵash 1993 jyly FIFA quramyna enbegen soń match ótkize almaǵan-dy. Al Qazaqstan FIFA-ǵa 1994 jyly múshe boldy. Jáne de 1999 jyly da Qazaqstan quramasy jasyl alańda óner kórsetpegen.
