«Egemen Qazaqstan» gazetinde jarııalanǵan «Birlese bilgen el bárin jeńedi» (8 sáýir, 2020 jyl) atty maqalasynda da Elbasy eldi birlikke shaqyrady. Birlikke jetetin qýatty kúsh joq ekendigin atalarymyz da nebir kemeńgerlikpen aıtyp ketken bolatyn. Elbasy óziniń sózinde Qazaqstannyń óz táýelsizdiginiń 30 jylynda san qıly joldan ótkendigin, el damýynyń durys jolyn tańdaı bilýdiń nátıjesinde qýatty da, abyroıly da bedeldi, halqynyń yntymaǵy jarasqan memleket qura alǵanymyzdy, atqarylǵan isterdi taǵy da kóz aldymyzǵa ákelip, jadymyzdy jańǵyrtqandaı boldy.
Ras, biz tarıhtyń asa kúrdeli kezinde táýelsizdikke qol jetkizdik. Nebir syndarly kezeńde, eldiń irgesi shaıqalyp keter tusta da, ekonomıka degenińiz quldyrap bitip, jumyssyzdyq jaılap, qazynamyz, dúken sóreleri bos qalyp, «qazaqtar óz betimen el bola almaıdy» degen senimsizdikter de úreı týǵyzǵan sátterde Elbasy óz halqymen boldy.
Elbasy táýelsiz memleket qurýdyń azapty kúnderi men uıqysyz túnderin halqymen birge ótkizdi. Elbasy bárin de halqymen birge kórdi, birge tózdi, birge jeńdi! Qazaqstandy álem Tuńǵysh Prezıdentimiz Nazarbaevtyń esimimen, Nazarbaevtyń kelbetimen, Nazarbaevtyń isimen tanydy.
Qazaqstan Prezıdenti Qasym-Jomart Toqaev óz sózinde N.Nazarbaevtyń álemdik saıasattaǵy uly tulǵa ekendigin oryndy atap kórsetkeni de bar. Elbasy elge arnaǵan sózinde taǵy da elimen birge ekendigin, el basyna tóngen osy bir indetti jaǵdaıdan halqynyń aman-saý shyǵýyn oılap, oı tolǵaıdy. Atalyq sózin aıta otyryp, abyzdyq oımen tolǵanǵan Elbasynyń jurt kóńiliniń alań osyndaı tusynda el ishinde úreı týdyratyn ósek-aıańdy taratýdyń ózi el ishine iritki salý dep baǵalaıdy. Jáne de «Kóptiń qamyn kózdeıtin adam aıǵaıshyl kúshimen emes, ıgilikti isimen qyzmet etkeni durys. Ǵaıbat pen baıbalam ornyna ǵylym-bilimmen shuǵyldanǵan abzal» deıdi Elbasy!
Tuńǵysh Prezıdentimiz Nursultan Nazarbaev álemdi jaılap bara jatqan asa qaýipti indetten Qazaq eliniń aman shyǵýy úshin Qasym-Jomart Toqaevtyń durys sheshim qabyldap jatqanyn jáne de bárimizdiń ony qoldap, bir bolýǵa shaqyrýy eldik sóz der edim.
Qazaq halqy aqyl-parasatty halyq! Bul synaqtan da amandyqpen óterimizge senim bar. Eń bastysy, qazirgi jaǵdaıda Elbasy aıtyp otyrǵan birlikti saqtaı otyryp, Prezıdentimiz Qasym-Jomart Toqaevtyń tótenshe jaǵdaıdan shyǵý jolynda belgilep otyrǵan barlyq amaldaryna qoldaý kórseteıik. Biz bárin de jeńemiz! Jaqsy kúnderimiz alda! Tek aman bolaıyq!
Jabal ERǴALIEV,
Qazaqstannyń eńbek sińirgen qaıratkeri, Senatorlar keńesiniń múshesi, Kókshetaý qalasynyń qurmetti azamaty
