Tigin mashınasyn tumar etken sheber

Tiginshilik onyń súıikti kásibi, abyroıly eńbegi. Kıim tigýdiń san túrli ádisteri men ulttyq oıýlardyń qanshama qupııalaryn has sheberge ómir tájirıbesi úıretti. Áli esinde, nebári 11 jasynda kórshi sheber apasyna jumys isteýge nıetin baryn aıtyp, qolǵabys etip júredi. Alaıda ýaqtyly is tigýge jasynyń saı kelmeıtini oılandyrady. 3 aı eńbek etken soń eń alǵashqy jalaqysyn alady. Tulymshaǵy jelbiregen 11 jasar Nurııash kórshilerine qolyndaǵy aqshasyn berip, Baký qalasynan tigin mashınasyn aldyrady. Búginge deıin osy tigin mashınasy sheberhana tórinde tumaryndaı bolyp saqtalyp keledi.

1956 jyly týǵan aǵasy oqýyn támamdap, áskerge shaqy­­­rylady da, anasyna kó­mek­­tesý úshin 15 jasar Nu­rııash kesh­ki mektepke aýysyp, jumys isteýge bel býady. Uzaq ýaqyt jumys izdep, áske­rı paradtyq kostıýmder tigetin sehqa qabyl­danady. Bul onyń kásibı sheberler arasynda basta­ǵan alǵashqy eńbek joly edi. Kóp ultty adamdarmen tez til ta­bysyp, tabysty jumys iste­ıdi. 1977 jyly barlyq kıim­di tige alatyn sheberge ult­tyq kıim­derdi tigý týraly oı keledi. Sóı­tip birneshe mem­le­ket­ke baryp materıaldar ákelip, fý­rnıtý­ra qoldanyp isin bastap ketedi.

– Sonaý 1985 jyly keıbir adamdardyń qazaqı kıimderge tosyrqaı qaraıtyn kezi edi. Soǵan qaramastan ulttyq kıimderdi tigýdi toqtatpadyq. Qazir zaman múldem basqasha, qazaqy kıimge degen suranys artyp, zamanaýı stılde tiktirip kıip jatqandar kóz qýantady. Ár kelgen tutynýshylaryma aıtqan kıimin tigip berip, onyń qýanyp, alǵysyn aıtyp, rıza bolyp bara jatqanyn kórý ba­qyt. Bul jumysty qıyn dep te, ońaı dep te aıtýǵa bol­maı­dy. О́zimniń súıikti isim bol­ǵan­dyq­tan osyndaı eńbek­pen úlken dárejege jetip otyrmyn, – deıdi sheber Nurııash Nııazova.

Qazir sheber basqaratyn «О́rnek» sán úıiniń Nur-Sultan, Atyraý, Aqtaý qala­larynda sheberhanalary men dúkenderi bar. Barlyǵynda 40 shaqty adamdy jumyspen qamtyp otyr. Tapsyrystar tolas­tar emes. Barlyq qala­dan suranysqa ıe ulttyq kıim­derdi, tipti shetelge syılyqqa aparatyndar kóptep sanalady. Munda erler men áıelderge arnalǵan barlyq kıim túri men bas kıimder tigilip shyǵady. Tapsyrys ásirese, naýryz merekesi qarsańynda qyza túsedi. Beshpent, kamzol, kájekeı, shapan, keýdeshe, kóılek, sáýkele, taqııanyń ult­tyq oıý-órnekpen kómkeril­gen san alýan túri osy sán úıi­niń týyndysy.

Prezıdent orkestriniń kıimderin, ulttyq gvardııa, túrli mádenı ujymdar, tipti EKSPO-nyń kıimderin de «О́rnek» sán úıi tikken. Sapaly, asa joǵary talǵammen tigiletin kıimder kózdiń jaýyn alady. Sheber matanyń sapasy men úılesimdi sánine kóp mán beredi. Ulttyq naqyshtaǵy stıldi zamanaýı úlgimen qabystyryp tigýden tájirıbeleri mol. Kásipker zaman kóshinen qalmaı, joǵary talǵamdy kıim tigýdi, oǵan jetekshilik etýdi jalǵastyra bermek. Osylaısha bar bilgenin jastarǵa úıretip, ómirin aı­shyqty órnektep keledi.

Ulttyq bolmysty jastarǵa nas­ı­hattaıtyn aldyńǵy býyn apa­lardyń, aq jaýlyqty ana­lar­dyń tálimi qashan da mańyzdy.

Mańǵystaý oblysy