Polıseıdi qorlaǵan jáne kúsh qoldanǵan er adamdar jaýapqa tartyldy. Olardyń áreketteri QR Qylmystyq kodeksiniń 380-baby (bılik ókiline qatysty kúsh qoldaný) jáne 378-baby -(bılik ókilin qorlaý) boıynsha tirkeldi.
«19 naýryzdan bastap Almatyda karantın rejımi engizildi. Koronovırýstyq ınfeksııamen kúres jónindegi jedel shtabtyń algorıtmine sáıkes, azamattarǵa erekshe jaǵdaılarda ǵana úılerinen shyǵýǵa bolady: dárihanaǵa, dúkenge nemese medısınalyq mekemelerge jedel barý kerek bolsa. Azamattardyń tótenshe jáne karantındik talaptardy saqtaýyn baqylaýdy ishki ister organdary júzege asyrady. Osyǵan baılanysty, polısııa qyzmetkerleri, Ulttyq ulan, Qorǵanys mınıstrligi jáne quqyq qorǵaý organdarynyń joǵary oqý oryndarynyń kýrsanttarynan qaladaǵy tártipti qamtamasyz etetin jaıaý patrýlder quryldy. Gogol men Qaıyrbekov kósheleriniń qıylysyndaǵy patrýldik jasaqtardyń biri bir top jastardy baıqap qaldy. Olar onlaın rejımde fıtnes – jattyǵýlardyń túsirilimin jasap jatty. Ýchaskelik ınspektor kelip, karantın kezeńinde qajet jaǵdaı bolmasa úıden shyǵýǵa tyıym salynatyndyǵyn aıtyp eskertý jasady. Onyń ústine, bul azamattardyń qasynda kishkentaı bala boldy, jáne olar onyń densaýlyǵyna qaýip tóndirdi», – dedi Almaty qalalyq Polısııa departamentiniń basshysy Qanat Taımerdenov.
Jastar polısııa qyzmetkeriniń eskertýine agressıvti jaýap berdi: olar memlekettik qyzmetkerdiń zańdy talaptaryna baǵynbaı, oǵan qarsy kúsh qoldandy. Náresteniń anasy óziniń zańsyz áreketterimen janjaldy jaǵdaı týǵyza bastady. Tótenshe jaǵdaıdy buzǵany úshin ol keıinirek jaýapqa tartylatyn bolady.
«Jasaǵan áreketteri úshin bul azamattar zań aldynda qatań túrde jaýap beredi. Quqyq buzýshylar óz áreketterimen bılik ókiliniń zańdy talabyn jáne el bıligi men tutas qoǵamnyń, árbir qazaqstandyqtyń ómiri men densaýlyǵyn saqtaý maqsatynda qabyldaǵan sharalaryn elemedi. Ýchaskelik polısııa ınspektoryna qarsy kúsh qoldanǵan er adamdarǵa qatysty sotqa deıingi tergeý bastaldy. Ustalǵandar ýaqytsha ustaý ızolıatoryna qamaldy. Bıliktiń zańdy talaptaryna baǵynbaǵan jaǵdaıda mundaı faktiler qatań túrde jazalanatyn bolady. Men azamattardy karantın rejımin qatań saqtaýǵa, sondaı-aq, ózderin jáne basqalardy juqtyrý qaýpine ushyratpaýǵa shaqyramyn», – dedi Taımerdenov.
