Baı bolsań, halqyńa paıdań tısin,
Batyr bolsań, jaýyńa naızań tısin, - dep aıtqan eken áıgili Áıteke bı.
Mine, Áıteke bıdiń osy ustanymyn berik ustanǵan qazaqtyń dańqty balýany Dáýlet Turlyhanov syn saǵatta jerlesterine qoldaý kórsetip, oblysymyzdyń 6 aýdanyna (Abaı, Aıagóz, Jarma, Kókpekti, Tarbaǵataı, Úrjar) 80 tonna azyq-túlik jiberipti.
Avtokerýenniń aldy keıbir aýdandarǵa jetip, balýannyń joldaǵan sálemdemesi áleýmettik jaǵdaıy nashar, kóp balaly otbasylarǵa jáne áleýmettik osal toptarǵa taratyla bastady.
«15 sáýir kúni Kókpektige Dáýlet Turlyhanov joldaǵan gýmanıtarlyq kómek kelip jetti. Aýdanǵa kelgen gýmanıtarlyq kómekti aýdan ákimi Ashat Saıdahmetuly bastaǵan jumys toby qarsy alyp, ókiline Dáýlet Bolatulyna baǵyttalǵan halyqtyń lebizin jetkizip, Alǵys hat tabystady. Aýdan basshysy arnaıy qurylǵan komıssııa múshelerine Dáýlet Bolatuly joldaǵan kómek qoryn 250 otbasyna qajettilikterine saı ádil bólip berýdi mindettedi» deıdi Kókpekti aýdany ákiminiń apparat basshysy Bek Nuǵybaev.
Qazir alty aýdan turǵyndaryna un, qant, kúrish, maı sııaqty eń qajetti azyq-túlik ónimderi taratylyp jatyr. «Dáýlet Bolatuly týǵan ólkesindegi jerlesterin esh umytpaıdy. Jahandy jaılaǵan indet kezinde, jumyssyz, áleýmettik jaǵdaıy kúrt tómendep ketken jandarǵa kómek berýdi azamattyq paryzy sanaıdy» deıdi osy ıgi sharany uıymdastyrýshylardyń biri Jandos Ilııasov.
Shyǵys Qazaqstan oblysy
