«Kaık» kásipornynyń mamandary qurastyrǵan tehnıka koronavırýspen kúreske qoldanylýda. Qazirgi ýaqytta qala kóshelerin dezınfeksııalaý jumysy qyzý júrip jatyr. Qalalyq ákimshiliktiń aqparaty boıynsha ázirge osyndaı 3 tehnıka jumyldyrylǵan. Arnaıy dezınfeksııalaý suıyqtyǵymen toltyrylǵan bir kólik az ýaqyttyń ishinde bes júz sharshy metrge deıingi jol tósesimin dezınfeksııalaı alady.
– Ýálıhanov pen Gorkıı kóshelerine saǵat ekide shyqtyq. Sodan Abylaıhan dańǵylyna deıin dezınfeksııalap óttik. Qazir ekinshi aınalymda kele jatyrmyz, saǵatyna 8-10 shaqyrymdyq jyldamdyqpen júrip, 12 shaqyrymdy qamtydyq, – deıdi «Tazalyq» seriktestiginiń kólik júrgizýshisi Borıs Astafev.
Mundaı tehnıka negizinen aýyl sharýashylyǵyna qoldanylady. Álemdi jaılaǵan indetpen kúreste bul agregattar qazirgi ýaqytta taptyrmas quralǵa aınaldy. «Qazaqstandyq agro-ınnovasııalyq korporasııasy» seriktestigi sýarǵysh kólikterdi beıimdep jasaýda.
– Biz munyń bárin tanap basynda tyńaıtqyshtar, hımıkattar sebetin qurylǵylar negizinde jasap shyǵardyq. Nátıjesinde paıdalanýǵa jaramdy bolyp shyqty, – deıdi «Kaik» seriktestigi óndiristik sehynyń bastyǵy Qaırat Dúısembekov.
Dezınfeksııaǵa paıdalanylatyn zat adamdar men janýarlarǵa qaýipsiz. Ol tek vırýstarǵa ǵana áser etedi. Al dezınfeksııa COVID-19 vırýsynan qorǵanýdyń eń tıimdi joly.
