Densaýlyq saqtaý basqarmasy baspasóz qyzmetiniń málimetinshe, oblys boıynsha búginge deıin 274 medısına mamany jalpy kólemi 41,7 mln teńge ústemeaqy alǵan. Máselen, ekinshi sanattaǵy qalypty jaǵdaıda jumys isteıtin 186 medısına qyzmetkeri 34 mln teńge alsa, úshinshi deńgeıdegi qaýipsizdik jaǵdaıynda jumys isteıtin 88 medısına qyzmetkerine 7,7 mln teńge tólengen.
Jumakúl Seksembaeva on jyldan beri túbirkúlezge qarsy oblystyq dıspanserde sanıtar bolyp jumys isteıdi.
- О́zderińiz bilesizder, sanıtarlardyń jumysy ońaı emes. Qazirgi eldegi jaǵdaıǵa baılanysty 26 naýryzdan bastap Tobyl qalasyndaǵy provızorlyq stasıonarda sanıtarlyq qyzmet atqaryp jatyrmyn. Karantınge alynǵandardy qabyldap, olardy zararsyzdandyrý jumystary meniń mindetim. 3 sáýirden beri biz de karantınde jatyrmyz. О́zim Qostanaı aýdanynyń Qazaqstan aýylynda turamyn. Otbasymdy kórmegeli eki aptadaı ýaqyt boldy. Bala-shaǵamdy saǵyndym. Amal joq, shydamdylyq tanytýymyz kerek. Osyndaı qıyn sátte bárimiz birge bolýymyz qajet. Oblystyq taýarlar men qyzmetterdiń sapasy men qaýipsizdigin qadaǵalaý departamentinde laborant bolyp qyzmet isteıtin ulym Nurbolym da eki aptaǵa Astanaǵa kómekke ketti. Ol qazir naǵyz indet oshaǵynyń ortasynda júr. Kúni-túni adam ómiri úshin arpalysyp júrgen balamnyń amandyǵyn Alladan tilep otyrmyn. Bizge qarjylaı kómektesip jatqan memleketke alǵysymyz sheksiz. Syıaqy da, ústemaqy da aldyq, óz basym kóńilim tolady. Bastysy, elimiz indetten ada bolyp, tezirek burynǵy mamyrajaı kúnimizge oralsaq eken. Eldiń tynyshtyǵy men halyqtyń amandyǵynan basqa mańyzdy eshteńe de joq, - dedi tájirıbeli sanıtar.
Qostanaı oblysy
