Oblystyq kitaphananyń bólim meńgerýshisi Maral Tájenovanyń aıtýynsha, kitaphana saıtyndaǵy «Vırtýaldy mýzeı» jobasy bes bólimnen turady. Birinshi bólimde soǵys taqyrybyna arnalǵan kitaptar. Oǵan Ǵalymbek Jumatov, Bekbolat Hazyrov, Sergeı Gorbýnov, Erkin Muńdynov sekildi jergilikti aqyn-jazýshylardyń 40-qa jýyq shyǵarmasy skanerli túrde kóshirmesimen ornalastyrylǵan. Ekinshi bólimge soǵys jyldarynda óńirimizde taralǵan gazetterdiń elektrondy nusqalary salynǵan. Úshinshi bólimde soǵys tarıhy týraly sheteldik saıttar men ınternet júıesindegi arhıvterdiń siltemeleri kórsetilgen. Tórtinshi bólimnen maıdannan kelgen hattardy oqýǵa bolady. Sondaı-aq jergilikti batyrlar men soǵys ardagerleriniń marapat qaǵazdary, basqa da qujattary bar. Al sońǵy bólimde soǵys jyldarynda túsirilgen fotolar toptastyrylǵan.
Byltyr Omby oblysyndaǵy (Reseı) volonterlerden óńirimizdegi Shaqa aýylynda týǵan jaýynger Boranbaı Isabekovtiń «Erligi úshin», «Lenıngradty qorǵaǵany úshin» medaldary Estonııanyń Tallın qalasynan tabylǵandyǵy týraly habar kelgen. Volonterler Boranbaı atamyzdyń Tallındegi baýyrlastar zıratyna jerlengenin aıtqan. Endi mine, urpaqtary maıdanger ákeleriniń jerlengen jerine baryp, taǵzym ete alady.
Reseılik «Memorıal» saıty jınaqtaǵan derekqorynyń málimetinshe, jaýynger Boranbaı Isabekov 1914 jyly Shoqtal aýylynda týǵan. Ásker qataryna Lebıaji aýdanynan shaqyrylǵan. 1078-inshi atqyshtar polki jaýyngerlik quramynda bolǵan.
– Men ákem soǵysqa ketken soń, 1942 jyly dúnıege kelippin. Ákemniń sońynan 1945 jyly «Qara qaǵaz» keldi. Atam-ájem tym bolmaǵanda qaı jerde jerlengenin bilsek dep otyratyn. «Bir habar bolyp qala ma?» dep ómir boıy úzilmegen úmitimiz aldamady, – deıdi maıdangerdiń qyzy Balsheker Boranbaıqyzy.
Al Shaqa aýylyndaǵy eskertkish taqtada Boranbaı Isabekovpen birge osy óńirden 300-deı azamat maıdanǵa attanǵany jazylǵan.
Endi kitaphana ujymy oblys ortalyǵyndaǵy Áskerı dańq mýzeıimen jáne memlekettik oblystyq arhıvpen birge jumys júrgizbek. Sıfrly júıege túspegen hattar men qujattardyń kópshiligi sol mekemelerde saqtaýly.
– Maqsat – ınternet keńistigin paıdalanatyn turǵyndarǵa soǵys jyldaryna qatysty ólketaný qujattaryn qoljetimdi etý. Bul jobanyń jalǵasýyna jergilikti turǵyndar da úlesterin qosa alady. Soǵysqa qatysqan, habarsyz ketken atalarynyń jáne basqa da týystarynyń sýretteri, basqa da qujattar saqtalǵan bolsa kitaphanaǵa alyp kelýge bolady. Derek kózderin sıfrly formatqa aınaldyryp, ınternet keńistiginde saqtaı alady, – deıdi Maral Tájenova.
Sonymen qatar aýdandyq jáne aýyldyq kitaphana qyzmetkerlerine de osyndaı usynys joldanǵan. Olar óz óńirlerinen soǵysqa qatysty tarıhı dúnıelerdi izdeıdi.
Kitaphana saıtyndaǵy «Vırtýaldy mýzeı» jobasy 9 mamyr kúni arnaıy túrde ashylady.
Pavlodar oblysy
