«О́zderińiz biletindeı, osyndaı qıyn jaǵdaıda halyqtyń áleýmettik osal toptaryna kómek kórsetý qajet, sol sebepten jasotandyqtar qala turǵyndaryna saqtaný quraldaryn tegin tarata bastady. Atalǵan 5 mln maska Elbasy bastamasymen qurylǵan «Biz birgemiz!» qory arqyly satyp alyndy», dedi Elnur Beısenbaev.
Sondaı-aq ol negizgi basymdyq az qamtylǵan kóp balaly otbasylarǵa, jalǵyzbasty qarttar men múgedekterge baǵyttalatynyn atap ótti. Iаǵnı dárihanaǵa barýdyń ózi qıyndyq týdyratyn azamattar birinshi kezekte eskeriledi. Sonymen qatar belsendiler osy aptada azyq-túlik taratýdy qaıta bastaıdy. Sondaı-aq jalǵyzbasty zeınetkerlerdi ystyq tamaqpen qamtamasyz etý jumystary jalǵastyrylatyn bolady. Bul istiń barlyǵy tek volonterlerdiń kómegimen iske asyrylýda. Olar da barlyq saqtaný kıimderimen, betperdelermen qamtamasyz etilgen.
«Biz elordanyń 40 000 otbasyn maskamen qamtamasyz etýdi josparlap otyrmyz. Árbir qorapta 50 qorǵanys quraly bar. Tek búgin ǵana biz 2 000 otbasyna 100 000 betperde tarattyq», dedi Jas Otan jetekshisi.
19 naýryzdan bastap Jas Otan jastar qanatynyń 3000-nan astam eriktisi Qazaqstan boıynsha 56 myńnan astam otbasyn birinshi qajettiliktegi azyq-túliktermen qamtamasyz etýge atsalysty. Kún saıyn Nur-Sultan jáne Almaty qalalarynda eriktiler 1200-den astam jalǵyzbasty zeınetkerlerdi ystyq tamaqpen qamtamasyz etýde. Sondaı-aq olar zeınetkerlerge dári-dármekterdi jáne qorǵanys quraldaryn jetkizýdi júzege asyrýda.
Tuńǵysh Prezıdent – Elbasy, Nur Otan partııasynyń Tóraǵasy N.Á.Nazarbaevtyń tapsyrmasy boıynsha qurylǵan «Biz birgemiz!» qory elimiz boıynsha ázirge 152 000 muqtaj otbasyna 56 000 teńge kóleminde aqshalaı kómek kórsetti. Nur-Sultan jáne Almaty qalalarynyń 2000-nan astam dárigerine de 50 000 teńge aqshalaı kómek jiberildi.
