Joba ssenarııine sáıkes, bıletti onlaın satyp alǵan kezde, jolaýshy Digital ID servısi arqyly tulǵany sáıkestendirýden ótýi tıis. Odan ári, poıyzǵa otyrǵyzý kezinde, jolserik bılet satyp alǵan jolaýshynyń tulǵasyn smartfondaǵy BJ kómegimen fotosýret arqyly nemese vagonnyń tolyǵýyn onlaın rejımde qadaǵalaýǵa múmkindik beretin, vagonǵa ornatylǵan kamera men kompıýter arqyly teksere alady.
Yntymaqtastyq aıasynda «Jolaýshylar tasymaly» AQ «Instant payments» JShS-men birlese otyryp Almaty-Oral baǵytyndaǵy Digital ID tulǵany qashyqtan sáıkestendirý servısiniń kómegimen bılet satý aıryqsha quqyǵyna ıe bir vagondy berip te úlgerdi.
Ideıa avtorlary mundaı sıfrlyq quraldardy engizý jolaýshylar tasymalynyń barlyq qatysýshylary úshin paıdaly bolatynyna senimdi. Jolaýshylardyń endi bılet satyp alý kezinde ózderiniń derekterin toltyrýy, sondaı-aq poıyzǵa otyrý kezinde jolserikterge jeke kýálikteri men bıletterin kórsetýi qajet emes. Al tasymaldaýshy, «Jolaýshylar tasymaly» AQ, shynaıy ýaqyt tártibinde vagondardyń tolyǵýyn qadaǵalap, bıletsiz jol júrý problemasynyń aldyn alýǵa, sonymen qatar indet nemese jahandyq qater jaǵdaıynda táýekel tobyna jatatyn tulǵalar tizimin jyldam anyqtaýǵa múmkindik alady.
«Atalǵan sheshim bılet satyp alý prosesin anǵaurlym ashyq ári tıimdi etpek. Bizdiń respýblıka deńgeıinde iri jobalardy iske asyrý, jekeleı alǵanda, ESQ-ny qashyqtan shyǵarý kezindegi tájirıbemiz bar. QTJ-men birlesken tájirıbeniń qazaqstandyqtardyń ómir sapasyn kóteretinine men úlken úmit artamyn», - dedi Digital ID basshysy Oleg Ganzıı.
Ideıany iske asyrýdan kútiletin taǵy bir oń áser – ol bıletterdi zańsyz qaıta satýmen kúres, atalǵan jaǵdaı merekeler men jazǵy demalys kezeńinde meılinshe beleń alady, bıletterdiń erkin satylymda bolmaýyna baılanysty adamdar ádette olardy deldaldardan joǵary baǵamen satyp alýǵa májbúr.
«Eýropalyq Odaq, Japonııa, Qytaı, Malaızııa, Sıngapýr elderiniń halyqaralyq tájirıbesi temirjol tasymalyna bıometrııa negizindegi IT-sheshimderdi engizýdiń tıimdiligin kórsetti. Jańa tehnologııalardy engizý jolaýshylar tasymaly kezinde adam faktoryn barynsha azaıtýǵa, demek sybaılas jemqorlyq táýekelderin, ásirese mereke kúnderindegi bılet tapshylyǵyn da tómendetýge múmkindik beredi. Kelesi mańyzdy faktor, sońǵy jaǵdaılar kórsetkendeı, jańa tehnologııalardy engizý jolaýshylar qaýipsizdigin aıtarlyqtaı arttyrady, bıometrııa tehnologııasy bar kameralar izdeý salynǵan nemese baılanysýshy tulǵa bolyp tabylatyn jolaýshylardy avtomatty túrde tanı alatyn bolady. Onyń barlyǵy qandaı parametrler qoıylǵanyna baılanysty bolmaq», - dep túsindirdi ıdeıa avtorlarynyń biri jáne «Adal jol» jobalyq keńsesiniń qyzmetkeri Jaqparov Kamalıdın.
Temirjol bıletterin satyp alýdyń jańa formaty olardy qaıtarý saıasatyna eshqandaı áser etpeıdi. Bıletterdi jolaýshylar aǵymdaǵy ýaqytta qoldanysta júrgen barlyq qaǵıdalarǵa saı aýystyra nemese qaıtara alady. Balalarmen jolǵa shyqqan jaǵdaıda, balalardyń derekteri sáıkestendirýsiz engiziletin bolady.
