Mamandar naýqas aýrýhanaǵa aýyr halde jetkizilgendigin aıtýda. Asa aýyr otany úsh hırýrg jasaǵan. Naýqastyń ishki qurylysynan shyqqan temirdiń salmaǵy 870 gramm.
–Bizdiń aýrýhanaǵa Arshaly aýdanynan aýyr halde naýqas kelip tústi. Onyń asqazanynan temir-tersek zattar tabyldy. Naýqastyń aıtýynsha, túrmede 18 qarasha kúni óz-ózine qol jumsamaq bolyp, shege jutqan. Birinshi joly 90-ǵa jýyq shege jutsa, keıin jeltoqsan aıynda taǵy 30-ǵa jýyq metall kesindilerin qylǵytypty. О́ziniń aıtýyna qaraǵanda, birinshi ret temir jutqannan keıin artynsha magnıtti de attandyrǵan. Sol sebepti de metall asqazanda bir jerge jınalyp turǵan,–deıdi oblystyq kópbeıindi aýrýhanasy hırýrgııa bólimshesiniń meńgerýshisi Baýyrjan Ahmetov.
35 jastaǵy er azamat ES 166/5535 túzetý kolonııasynda qamaýda otyrǵan. Onyń bul áreketi bostandyqqa shyǵýdyń amaly bolsa kerek. Bir qyzyǵy naýqas metall kesindilerin jutyp 4 aı júrgen. Abyroı bolǵanda ishki qurylysy qatty zaqymdanbaı, aman qalǵan.
–Bizge kelgen kezdegi jaǵdaıy óte aýyr boldy. Aryqtap júdep qalǵan. Júregi aınyp, jany qysyla bastady. Asqazanynyń oń jaǵyna qaraı qatty shanshyp aýyrdy,–deıdi oblystyq kópbeıindi aýrýhanasy hırýrgııa bólimshesiniń meńgerýshisi Baýyrjan Ahmetov.
Hırýrgter mundaı otany birinshi ret jasap otyrǵan joq. Áıtkenmen, 36 jyl eńbek ótili bar dáriger adamnyń ishki qurylysynan osynsha kólemde temir-tersek almaǵanyn aıtty.
–Bir-eki saǵat tekseristen keıin ota jasaýǵa kiristik. Ota barysynda barlyq temirdiń asqazanda ekeni anyqtaldy,–deıdi oblystyq kópbeıindi aýrýhanasy hırýrgııa bólimshesiniń meńgerýshisi Baýyrjan Ahmetov.
Qazir naýqastyń ómirine qaýip tónip turǵan joq. Ol, ota jasalǵannan keıin bir apta dárigerlerdiń baqylaýynda bolǵan. Odan soń qaıtadan túzetý mekemesine jetkizildi.
Kókshetaý qalasy.
