«Búginde elimizde koronavırýs juqtyrǵandardyń 79 paıyzynyń aýrýy sımptomsyz nemese jeńil ótýde. 18 paıyz naýqastyń jaǵdaıy ortasha bolsa, 21 adamnyń hali aýyr, al 2 adam asa aýyr kúıde jatyr. Sondaı-aq olardyń ishinde bir jasqa tolmaǵan eki bala bar. Olar klınıkalyq hattamaǵa sáıkes qandaı preparattardy qandaı mólsherde berý kerektigi bekitilgen tártipke saı em alýda. Bireýiniń jaǵdaıy qanaǵattanarlyq, vırýs anyqtalǵanymen aýrýdyń belgisi baıqalmaıdy. Ekinshi bala aýyr halde. Biraq ol bala týabitti patologııasyna baılanysty aýyr jaǵdaıda jatyr. Jalpy indetke dýshar bolǵandardyń barlyǵynyń jaǵdaıy baqylaýǵa alynǵan. Vırýs oshaqtarymen baılanysta bolǵan 31 512 adam anyqtaldy. Onyń ishinde 30 850 adam (98 paıyzy) oqshaýlanǵan. Elde aýrýdy juqtyrý deńgeıi 15 paıyzdyq mólsherde. Alaıda keıbir óńirlerde bul kórsetkish 20-dan 60 paıyzǵa deıin jetip otyr. Bul óńirlerde engizilgen karantın tártibin qatań saqtaýdy talap etedi», dedi A.Esmaǵambetova.
Bas sanıtar 14 sáýirde karantındik sharalardy kúsheıtý týraly sheshim qabyldaǵanyn jetkizdi. Qaýlyny tanystyrǵan ol: «Barlyq aýrýhanalar kúsheıtilgen epıdemııaǵa qarsy rejimge kóshedi, onda ár pasıent koronavırýsqa kúmándi retinde qabyldanady. Naýqastardy qabyldaýǵa jáne dıagnoz qoıýǵa qatysatyn aýrýhanalar men emhanalardyń barlyq medısınalyq qyzmetkerleri jeke qorǵanysh quraldaryn paıdalanýy kerek», dedi.
Qaýly boıynsha karantındik jáne provızorlyq aýrýhanalarda talap kúsheıtiledi. «Stasıonarlarda beınebaqylaý kameralary ornatylyp, tıisti jeldetý
júıesi jolǵa qoıylýy tıis. Medısınalyq uıymdardyń ár aýysymy bir-birinen oqshaýlana júrýi kerek. Sondaı-aq dezınfeksııa rejimi qatań saqtalyp, barlyq qyzmetkerlerdiń densaýlyǵy kúndelikti tekseriledi. Osyǵan baılanysty barlyq bas dárigerler qyzmetkerlerdi jeke qorǵanysh quraldarymen qamtamasyz etýge mindetti, buǵan olar jaýap beredi», dedi A.Esmaǵambetova.
Elimizdiń 13 óńirinde 423 medısına qyzmetkeri COVID-19 vırýsyn juqtyrǵan. Bas sanıtardyń habarlaýynsha, olardyń jartysynan kóbi Almatyda anyqtalǵan. «Medısına qyzmetkerleri arasynda 423 koronavırýstyq ınfeksııa jaǵdaıy tirkeldi. Bul 13 óńirde tirkeldi. Joǵary kórsetkish Almatyda – 53 paıyz. Al Nur-Sultanda – 33 paıyz, Shymkentte 24 paıyz», dedi A.Esmaǵambetova.
Sondaı-aq koronavırýspen kúreske tartylǵan dárigerlerdiń jetkilikti ekenin jetkizgen ol: «Medısınalyq uıymdarda dárigerlerdiń jetispeýshiligin boldyrmaý maqsatynda ár óńirde 10 paıyzdan bastap 20 paıyzǵa deıin rezerv qarastyrylǵan. Sondyqtan búginde medısına qyzmetkerleri jetkilikti», dedi.
Koronavırýstyń aldyn alýdyń birden-bir joly karantın ekenin basa qaıtalaǵan elimizdiń bas sanıtarlyq dárigeri onyń uzaqqa sozylý, sozylmaýy da halyqqa baılanysty ekenin atap ótti. «Infeksııanyń taralý órisine taldaý júrgize otyryp, koronavırýs juqtyrǵan bir adamnyń 80 adamǵa deıin juqtyrýy múmkin ekenin bilip otyrmyz. Karantın kezinde de kórshiler bir-birimen áńgime-dúken qurýdy doǵarar emes. Osylaısha bir-birine vırýs juqtyrady. Mundaı jaǵdaılar kezdesti. Ortasha eseppen bizde koronavırýs juqtyrǵan 1 adammen 30 adam baılanysta bolady eken. Naýqastardyń 70 paıyzynyń aýrý belgisi baıqalmaıdy. Demek sap-saý kóringen adamnyń ózi ınfeksııa taratýy múmkin. Prezıdent janyndaǵy Tótenshe jaǵdaı rejimin qamtamasyz etý boıynsha memlekettik komıssııa tótenshe jaǵdaıdy 30 sáýirge deıin uzartty. Al karantınniń ári qaraı sozylýy da ózimizge baılanysty bolmaq. Iаǵnı karantın sharalaryn qatań saqtap, oqshaýlansaq máseleniń sheshilýi de tezdeıdi», dedi ol.
