Juqpaly indettiń kúrt beleń alýy jastardyń qalypty bastamasyn basqa arnaǵa buryp, jumysty kúsheıtilgen jaǵdaıda isteýde májbúr etkeni anyq. Rasymen de volonterlerdiń tótenshe jaǵdaı kezindegi eńbegi eresen. Koronavırýs ınfeksııasynyń jyldam taralýy karantın aýmaǵyndaǵy turǵyndardyń kómekke muqtajdyǵyn da eselep arttyrdy. Osy qıyn-qystaý sátte salmaqtyń bir ushy erikti jastarǵa túsip turǵanyn aıtýymyz kerek. Qazir kóp balaly otbasylar men áleýmettik jaǵynan az qamtylǵan áýletterge tegin azyq-túlik taratý, medısınalyq zattar men basqa da kerek-jaraqpen qamtý isiniń bastaýynda volonterlar júr. Almaty oblysynda bul baǵyttaǵy jumys «Meıirimdi Jetisý» front-keńsesiniń aıasynda iske asyrylýda. Tótenshe jaǵdaı jarııalanǵan alǵashqy kúnnen bastap bul jerde turǵyndardyń ótishinin qabyldaıtyn qaýirt jeli iske qosylǵan bolatyn. Búginge deıin 2634 adam front-keńsege habarlasyp, kómek suraǵan. Onyń ishinde 1098 adam áleýmettik kómekke muqtajdyǵyn aıtyp, azyq-túlikpen qamtýdy ótinse, 302 turǵyn qashyqtan oqytýǵa qatysty suraq qoıǵan. Al qaýirt jelige habarlasqan 368 adam densaýlyq saqtaý salasyna qatysty ótinish aıtyp, mamandardyń kómegine zárý ekenin aıtqan. Sondaı-aq 404-404 telefon nómirine 42 500 teńge kólemindegi áleýmettik tólemge qatysty anyqtama alý úshin birer táýlik ishinde 864 adam qońyraý shalypty.
Jalpy, «Meıirimdi Jetisý» front-keńsesiniń eriktileri áleýmettik jaǵdaıy tómen, az qamtylǵan jáne kópbalaly otbasylar men jalǵyzbasty analarǵa qol ushyn sozýdan aıanyp otyrǵan joq. Qazirge deıin 7501 otbasyna kómek kórsetilip, azyq-túlikpen qamtamasyz etilgen. Jáne oblysta eriktilerdiń atsalysýymen 46000 dana medısınalyq betperde tigilip, turǵyndarǵa taratyldy. Sondaı-aq jastar 936 ret qaıyrymdylyq aksııasyn ótkizgen. Shar aıasynda volonterler dezınfeksııalyq jumystarǵa atsalysý, azyq-túlik tasymaldaý, medısınalyq antıseptık, jeke gıgıenalyq zattar jáne maskamen qamtamasyz etýmen aınalysty. Aımaqtaǵy jalǵyzbasty qarııalardyń úıine tazalyq jumystaryn júrgizý de jastar úshin turaqty iske aınaldy.
Taldyqorǵandyq alǵyr azamat Dıdar Jumahannyń eriktiler qataryna qosylǵanyna jaqynda eki jyl toldy. Ol 2018 jyly Jetisýdaǵy volonter jastardyń uıymyna júrek qalaýymen kelip qosylǵan eken. Qazir «Meıirimdi Jetisý» front-keńsesinde avtoerikti retinde eńbektenýde.
- Jaqsylyq jasaý, jyǵylǵanǵa súıeý, jylaǵanǵa tireý bolý – kez kelgen adamnyń qolynan keletin is. Tipti bul qazaq halqynyń ómir zańdylyǵy men kúndelikti turmys-tirshiligine sińisip ketken ıgilik dep oılaımyn óz basym. 2018 jyldan bastap Taldyqorǵandaǵy eriktiler uıymynyń belsendi múshesimin. Men volonterlik joldy tańdaýymnyń sebebin adamdarǵa jaqsylyq jasap, qoǵamǵa tıtteı bolsyn paıdamdy tıgizý dep túsindirsem, artyq bolamaıtyn shyǵar. Biz qazir muny óz isimizben dáleldep júrmiz. Elimizde bolyp jatqan tótenshe jaǵdaıǵa baılanysty Almaty oblysy Jastar saıasaty basqarmasy janynan qurylǵan «Meırimdi Jetisý» front – keńsesine avtovolonterler asa qajet bolyp tur. О́ıtkeni qaýirt jelige habarlasqan adam sany kúrt kóbeıdi. Muqtaj jandarǵa kómek berý úshin, qajetti zattardy jetkizý úshin kólik únemi qajet. Biz bul jumystan áste tartynbaımyz. Búginge deıin bizdiń avtovolonterler 2635 otbasyna azyq-túlik, dári-dármekter jetkizgen eken. Árıne, bul meniń ǵana emes istep jatqan jumysym emes, dostarymnyń jáne óz isiniń sheberine aınalǵan barlyq eriktilerdiń, mamandardyń ortaq eńbegi. Qazir koronavırýstyń taralýy jıilep ketti ǵoı, osy kúnde áke-sheshem qatty alańdaıtyn boldy. Men ol kisilerge erikti ekenimdi eskertip, tótenshe jaǵdaıǵa baılanysty turǵyndarǵa kómegimdi tıgizý kerek ekenin túsindirdim. Al ózim avtovolonter bolý – alǵys pen bata alý dep oılaımyn ári jumysymdy jalǵastyra beremin, - deıdi taldyqorǵandyq avtoerikti Dıdar Jumahan.
Aıtpaqshy, osy maqalany daıyndaý barysynda biz Ile aýdanyndaǵy eriktiler qozǵalysynyń úılestirýshisi Dastan Erýbaevpen keshqurym onlaın baılanysqa shyǵýǵa kelisip, naqty ýaqyt belgilegen edik. Alaıda, eriktini uzaq kútýge týra keldi. Arada bir saǵattaı ótkende telefonmen habarlasyp, sózdi qysqa qaıyrǵan volonter bizge qajet aqparatty túnde jazyp jiberetinin eskertti.
...Dastannyń WhatsApp jelisine jazǵan habarlamasyn ertesi biraq oqydyq. Ol hatty saǵat túngi 1 shamasynda joldaǵan eken, biz bul ýaqytta uıqy qushaǵynda edik.
- Aǵa, aıypqa buıyrmańyz. Sizge bergen ýádemdi ýaqytynda oryndaı almadym, úıge kirgen betim osy. Uıat bolmasyn dep, suraǵan aqparatyńyzdy túndeletip jazyp otyrmyn, - dep bastapty ol habarlamasyn. Jaǵdaı bylaı bolǵan eken: volonter bizben onlaın baılanysqa shyǵýǵa daıyndyq jasap otyryp, áleýmettik jeliden Ile aýdany aýmaǵynda turatyn kómekke muqtaj adam jaıly jazbany kórip qalady. Dereý jazba ıesine habarlasqan Dastan áleýmettik jaǵynan az qamtylǵan áýlettiń azyq-túliksiz qalǵanyn anyqtaıdy. Dereý iske kirisken bul aýdan ákimdigine habarlasyp, muqtaj otbasyna kómek uıymdastyrypty.
- Jumys kúni aıaqtalyp qalǵandyqtan shuǵyl áreket etýge týra keldi. Eger eriktiler demeýshiler bergen azyq-túlikti muqtaj otbasyna jetkizip úlgermegende, ol áýlet qınalyp qalar ma edi. Qazir bizge ýaqytpen sanaspaı jumys isteýge týra kelip tur, - depti óz habarlamasynda aǵynan jarylǵan Dastan.
Árıne, eriktiniń bul azamattyǵyna alǵystan basqa aıtyrmyz bar ma? Jas jigit jaraǵan eken. Jalpy, Ile aýdany jastarynyń izgi joly jalǵasyp jatyr. Aýdanda tótenshe jaǵdaıǵa baılanysty turaqty jumysy toqtap, tabys kózinen aıyrylǵan jandarǵa, sonymen qatar kóp balaly analar men jaǵdaıy tómen otbasylarǵa jeke kásipkerler atynan kómek uıymdastyrýda. Bul istiń basynda erikti jastar júr. Búginge deıin 1776 dana áleýmettik azyq-túlik sebeti jasalyp, muqtaj jandarǵa tegin taratylypty. Buǵan da volonterler atsalysqan. Kóp balaly otbasylar men az qamtylǵan áýletterge 5000 danadan astam maska taǵy berilgen. Dastannyń ózi bas bolyp aýdandaǵy «Asar ume» qoryn daıyndaǵan 60 shaqty azyq túlik sebetin de kómek suraǵan úılerge jetkizip beripti.
- Mine, «Arkaz Invest» JShS kómegimen 3000 otbasyǵa tegin azyq-túlik jetkizip jatyrmyz. Bul istiń bárine aýdan jastary óte belsendi atsalysýda. Qazir júzden asa volonter kún saıyn aýdan ákimdiginiń jumysyna, tártip saqshylary kómektesip, erikti túrde mindetterin atqaryp júr, - deıdi Ile aýdanyndaǵy eriktiler qozǵalysynyń úılestirýshisi Dastan Erýbaev.
