Qyzylorda oblysy boıynsha 183,1 myń gektarǵa egis egý josparlanyp otyr. Onyń ishinde negizgi daqyl kúrishtiń kólemi 88,2 myń gektar. Al, basqa dándi daqyldar 9,8 myń, maıly daqyldar 6 myń, mal azyqtyq daqyldary 61,6 myń, kartop, kókónis, baqsha 17,7 myń gektarǵa egiledi.
Búginde óńirde egilgen egis kólemi 27,8 myń gektar, onyń ishinde 3,8 myń (100,5%) gektary - jazdyq bıdaı, 600 gektarǵa (jospardyń 105,6%) jazdyq arpa, 4,8 myń gektar(85,7%) – maqsary, 18,6 myń gektar (98,9%)– jońyshqa.
О́ńirdiń negizgi daqyly «kúrishti» egý jumystary sáýir aıynyń 20-nan keıin bastalady dep kútilýde.
Oblysta egis kólemderin ártaraptandyrý baǵytynda bıylǵy jyly soıa daqylyn 290 gektarǵa, qant qyzylshasyn 200 gektarǵa ulǵaıtýdy jáne 164 gektar jerge jemis-jıdek, júzim otyrǵyzý mejelenip otyr. Buryn oblysta 366,7 gektarǵa – alma, 2,2 gektarǵa – júzim, 37,4 gektarǵa – basqa jemis-jıdekterdiń túrleri egiletin.
Sonymen qatar, sý únemdeý tehnologııasyn qoldaný arqyly barlyǵy 200 gektar jerge aýyl sharýashylyǵy daqyldaryn ornalastyrý josparlanýda. Onyń 80 gektaryna ylǵal saqtaǵysh tehnologııasyn paıdalaný arqyly 80 gektarǵa kúzdik bıdaı egilgen. Tamshylatyp sýarý ádisimen – 23 gektarǵa jemis, kókónis, baqsha daqyldary, jańbyrlatyp sýarý ádisimen – 97 gektarǵa júgeri, jońyshqa daqyldary egiledi.
Aımaqta egistikke qajetti mıneraldyq tyńaıtqyshtar men tuqymdyq materıaldar tolyq qamtamasyz etilgen. Aýyl sharýashylyǵy tehnıkalary tolyqtaı daıyndalyp, egis egý naýqanyna qatysýda.
Oblysqa 2020 jyldyń kóktemgi egis jáne dala jumystaryn júrgizýge 14 myń tonna arzandatylǵan dızel otyny bólingen. Naýryz aıyna bólingen 3250 tonna dızel otyny oblysqa jetkizilip, sharýashylyqtarǵa tolyǵymen taratyldy. Sáýir aıyna bólingen 4615 tonna dızel otynyna tolyq kelisim-shart jasalyp, 1479 tonna dızel otyny oblysqa jetkizilip, onyń 700 tonnasy sharýashylyqtarǵa taratyldy.
Memleket basshysynyń dızel otynynyń baǵasyn arzandatý boıynsha bergen tapsyrmasyna sáıkes, búginde arzandatylǵan dızel otynynyń baǵasy ár lıtrge 162 teńgeni qurap otyr.
Oblysta 2020 jyly mejelengen egis kólemderine sáıkes, kóktemgi dala jáne egis egý jumystaryna qajetti qarjy kólemi 8,5 mlrd. teńgeni qurap otyr.
«Agrarlyq nesıe korporasııasy» AQ arqyly 19 sharýashylyq qurylymy 339,4 mln teńgege, «Agroholdıng Qyzylorda» JShS arqyly 34 sharýashylyq qurylymy 489,6 mln teńgege qarjylandyrylǵan. Fermerlerdi qarjylandyrý jumystary jalǵastyrylýda.
