Otyrysta Májiliste maquldanǵan zań jobalaryn bólý máselesi qaraldy, zań jobalary boıynsha negizgi komıtetter belgilenip, Senattyń 30 sáýirge josparlanǵan kezekti otyrysynyń kún tártibi bekitildi.
Bıýro otyrysynda sóz alǵan Darıǵa Nazarbaeva Palata otyrysynyń kún tártibine engizilgen zań jobalary bizdiń memleket pen qoǵam úshin asa mańyzdy ekenin atap ótti. Sońǵy jyldary azamattarymyz kóterip júrgen kóptegen máseleler osy jańa zańnamalyq aktilerde kórinis tapty.
Máselen, «Ardagerler týraly» jáne "Keıbir zańnamalyq aktilerge áleýmettik qamsyzdandyrý máseleleri boıynsha ózgerister men tolyqtyrýlar engizý týraly" zań jobalary Otanymyzdyń aldynda áskerı jáne azamattyq boryshyn ótegen ardagerler men azamattardyń quqyqtary men áleýmettik múddelerin qorǵaý máselelerin retteýge baǵyttalǵan. Sonymen qatar osy qujatpen basqa memleketterdiń aýmaǵynda urys qımyldaryna qatysqan ardagerlerdiń jańa sanaty engiziledi.
«Biz sonymen birge beıbit jınalystardy uıymdastyrý jáne ótkizý tártibi týraly zań jobasyn da qaraımyz. Bul zań jobasy elimizde jınalystar men mıtıngiler uıymdastyrý, ótkizýdiń qazirgi praktıkasyn túbegeıli túrde ózgertedi. Joba azamattardyń quqyqtaryn, mıtıngiler ótkizý kezindegi jaýaptylyqty ońtaıly ushtastyrýǵa baǵyttalǵan jáne tutastaı alǵanda halyqaralyq standarttarǵa sáıkes keledi», - dedi D.Nazarbaeva.
Senat Tóraǵasy D.Nazarbaeva Bıýro otyrysyn qorytyndylaı kelip, elimizde koronavırýs juqtyrǵandar sany artyp, údemeli kezeńge jetýine baılanysty tótenshe jaǵdaı tártibiniń 1 mamyrǵa deıin uzartylýy qajetti shara bolǵanyn atap ótti.
«Búginnen bastap Nur-Sultan jáne Almaty qalalaryndaǵy keıbir kásipkerlik sýbektileri sanıtarlyq-epıdemıologııalyq sharalardy saqtaı otyryp, jumystaryn bastaıtyn bolady. Osyǵan baılanysty kásiporyndar qyzmetkerlerin jumysqa shyǵarýǵa daıyn ba? - degen suraq mańyzdy bolyp otyr. Olar óz ujymdaryna qaýipsizdik pen gıgıena saqtaýǵa qajetti barlyq jaǵdaıdy jasaı ala ma?» - dedi D.Nazarbaeva.
Senat Tóraǵasy elimizdiń tótenshe jaǵdaı kezindegi qoldanystaǵy ákimshilendirý, memlekettik organdardy úılestirý, zańnama men zańnan keıingi aktiler júıesin taldaý qajettigin aıta kelip, tótenshe jaǵdaı men tótenshe oqıǵa tártibine eldi jumyldyrý daıyndyǵy taqyrybyna arnalǵan parlamenttik tyńdaýlardy Senattyń qazan aıyndaǵy jumys josparyna engizýdi usyndy.
D.Nazarbaeva ákimdikter bergen aqparattarǵa sáıkes, ortalyq pen jergilikti jerlerdegi jumysty úılestirý nashar ekenin, kelisý men máseleni sheshýge kóp ýaqyt ketetinin atap ótti. «Jumyldyrý rezervi týraly másele aýqymdy bolyp otyr. Qazir bizde jumyldyrý daıyndyǵy boıynsha zań jobasy bar. Ol zamanaýı talaptarǵa júıeli ári keshendi túrde jaýap bere almaıdy. Jaqsy bolsa da, jaman bolsa da bizde qazir is júzinde tájirıbe bar jáne ony qyzmetimizde paıdalaný kerek», - dedi ol.
Sonymen qatar, Senat basshysy buqaralyq aqparat quraldarynda jarııalanǵan jýrnalıster, dárigerler, polısııa men áskerı qyzmetkerlerdiń, eriktilerdiń qatysýymen oryn alǵan keleńsiz kórinisterge de toqtaldy.
«Búgingi tańda dárigerler de, jýrnalıster de alǵy shepte qyzý eńbek etip jatqanyn eske salǵym keledi. Olar yqtımal qaýip-qatermen kúnde betpe-bet kelse de ózderiniń kásibı boryshyn adal atqaryp júr. Sondyqtan olarǵa quqyqtyq qorǵaý men adamı qoldaý asa qajet», - dedi ol.
Darıǵa Nazarbaeva qazir kinálini izdemeı, túsinbeýshilikterdi órshitpeı, ózekti máselelerdi birigip sheship, yntymaqpen jumys isteıtin, bir-birine kómektesetin ýaqyt ekenin atap ótti. Bul rette quqyq qorǵaý organdarynyń qyzmetkerlerine baǵynbaý, ásirese polısııaǵa shabýyl jasaý nemese qarsylyq kórsetýdiń jolyn kesý kerek. Quqyq qorǵaý organdarynyń qyzmetkerleri óz ókilettilikteriniń aıasynda ǵana áreket etýi, sypaıy, ádepti bolýy tıis.
«Qazir bárine de qıyn, biraq bir-birimizge járdemdesip qana osy jaǵdaıdan tezirek shyǵa alamyz», - dep atap ótti D.Nazarbaeva.
