Jastar resýrstyq ortalyǵynyń dırektory Araılym Esimbekovanyń aıtýynsha, qazir óńirde 1000-ǵa jýyq volonter túrli sharalarǵa atsalysýda. «Onyń ishinde О́skemende – 110, Semeıde – 70 adam azyq-túlik tasymalymen aınalysýda. Olar medısınalyq maskalarmen, kolǵaptarmen, qorǵanysh kostıýmderimen jáne antıseptıktermen tolyqtaı qamtamasyz etilgen. Volonterler qataryna qosylǵysy kelgender oblystyq Jastar resýrstyq ortalyǵyna habarlasyp jatady. Qazirgideı Tótenshe jaǵdaı kezinde volonterler talaı ıgi sharalarǵa bilek sybana qatysyp jatyr. Atap aıtqanda, qarttar men múgedekterge eń qajet zattardy úıge deıin jetkizip berýde. Olarǵa telefon arqyly tapsyrys berse bolǵany. Baılanys ortalyǵynyń mamandary ótinishterdi 07:00-den bastap 19:00-ge deıin qabyldaıdy. Semeı men О́skemen qalalaryna kirý-shyǵý joldary jabylyp, blok-beketter qoıylǵan. Kún demeı, tún demeı eńbek etip júrgen quqyq qorǵaý organdary men medısına salasynyń mamandaryna, áskerı qyzmetkerlerdiń ıyǵyna úlken jaýapkershilik júktelgeni aıtpasa da túsinikti. Olarǵa qoldaý kórsetý maqsatynda shyǵysqazaqstandyq jastar «Jylý syıla» aksııasyn uıymdastyrdy. Sóıtip 15 volonter blok-beketterdegi qyzmetkerlerge ystyq shaı men baýyrsaq taratty. Sonymen qatar eriktilerimiz tártip saqshylarymen birge turǵyndarǵa tótenshe jaǵdaı kezindegi shekteýler týraly túsindirý jumystaryn da júrgizgen. Shara barysynda júrgizýshilerge koronavırýs ınfeksııasynan saqtanýdyń joldary kórsetilgen jadynamalar taratyldy. Jaqyn kúnderi «Qaıyrymdy kórshiler» aksııasyn qolǵa almaq oıdamyz. Shynyn aıtqanda, volonterler muqtaj jandardyń barlyǵyn anyqtaı almaıdy. Sol úshin halyqqa «О́z kósheńizdegi qazynaly qarttarǵa, múgedekterge sizdiń kómegińiz qajet. Eger dúkenge bara jatsańyz, olardyń kerek zattaryn ala kelseńiz nur ústine nur bolady», dep áleýmettik jeliler arqyly beınerolıkter taratyp, saýapty iske shaqyrýdamyz. Osyndaı syn saǵatta volonterler judyryqtaı jumylyp jumys isteýde. Tipti olardyń arasynda az qamtylǵan otbasylarǵa qarjylaı qoldaý kórsetip jatqandar da bar», deıdi ol.
Shyǵys Qazaqstan oblysy
