Kelisim-shart boıynsha qurylystyń jalpy quny QQS-men 5,5 mlrd. teńgeni quraıdy. Bul rette qurylys kompanııasy jedel qurylys jumystarynda qoldanylatyn open book prınsıpi boıynsha jumys isteıdi. Qurylys júrgizetin mekeme barlyq aǵymdaǵy shyǵystardy esepteıdi jáne tapsyrys berýshige esep beredi. Bul rette ol shart somasynan aspaýy tıis.
Qazirgi ýaqytta qurylysy áli aıaqtalmaǵan, biraq qurylys salýshynyń aldyn-ala málimetteri boıynsha jumys barysynda aıtarlyqtaı únemdeýge qol jetkizildi. Sonyń esebinen medısınalyq qural-jabdyqtar satyp alynady. Sonymen birge, qurylys júrgizýshi jumysty ózindik quny boıynsha oryndaýǵa mindetteldi. Naqty derekter nysan aıaqtalǵannan keıin habarlanady.
Eske salsaq, Almatyda Prezıdent janyndaǵy tótenshe jaǵdaıdy qamtamasyz etý jónindegi Memlekettik komıssııanyń sheshimimen aldyn-ala daıyndalǵan juqpaly aýrýlar aýrýhanasynyń qurylysy júrgizilýde. Aýrýhana 280 kereýetke arnalǵan. Sonyń ishinde 28 kereýet ıntensıvti terapııa bólimshesine arnalady.
Naýqastar «legin» bólý qaǵıdatyna sáıkes aýrýhana «taza» jáne «jumys isteıtin» (ınfeksııalanǵan) aımaqtarǵa bólinedi. Palatalarda teris qysymdy jáne aýany dezınfeksııalaýdy qamtamasyz etetin jeldetkish ornatylady. Palatalardan, ákimshilik bólmelerden basqa, zerthanaǵa arnalǵan eki bólme, kompıýterlik tomografııa bólimshesine arnalǵan bólme men rentgen-kabınet, zararsyzdandyrý bólmesi, dızel-generatory bar rezervtik energııamen qamtamasyz etý kózdelgen.
Sonymen qatar Qazaqstan Respýblıkasynyń QK-niń 274-babyna sáıkes ádeıi jalǵan aqparat taratqany úshin aıyppul (5 myń AEK-ke deıingi mólsherde), túzeý jumystary, qoǵamdyq jumystarǵa tartý, 5 jylǵa deıingi merzimge bas bostandyǵyn shekteý nemese aıyrý túrindegi qylmystyq jaýapkershilik qarastyrylǵanyn atap ótken jón. Tótenshe jaǵdaı kezinde ádeıi jalǵan aqparat taratqany úshin úsh jyldan jeti jylǵa deıingi merzimge bas bostandyǵyn shekteý nemese aıyrý túrindegi qylmystyq jaýapkershilik kózdelgen.
