Korporasııanyń baspasóz qyzmetiniń habarlaýynsha, búgingi tańda nesıe tóleý merzimin keıinge shegerý týraly 81 ótinish túsken. Olardyń qaryzynyń jalpy somasy 6,3 mlrd teńgeden asady. Ár ótinim jeke tártip boıynsha qarastyrylýda.
– «QazAgro» holdınginiń «Agrarlyq nesıe korporasııasy» jalpy somasy 4,31 mlrd teńgeni quraıtyn 32 kásipkerdiń qaryzyn tóleý boıynsha merzimdi keıinge shegerýdi maquldady. 51 ótinim qarastyrylyp jatyr. Aıta keterligi, 299 mln teńge kóleminde nesıe alǵan bir kásipkerdiń ótinishi maquldanbady. Sebebi, bul qaryz alýshynyń qoldanystaǵy tólemderge qatysty jeńildik kezeńi bar. Atalǵan kásipker shart talaptaryna sáıkes ázirge tólem jasamaıdy, – dep habarlady korporasııanyń baspasóz qyzmeti.
Tólemderdi keıinge shegerý erejesi boıynsha tótenshe jaǵdaı rejiminiń saldarynan qarjylyq jaǵdaıy nasharlaǵan klıentterdiń ǵana ótinishteri maquldanady. Qarjylyq jaǵdaıdyń nasharlaýy satylǵan taýarlardyń azaıýy, kórsetilgen qyzmetter kóleminiń tómendeýi, ónimdi satyp alýshylardyń tólem merzimin toqtatýy nemese ózgertýi jáne taǵy basqa da faktorlar arqyly anyqtalady. Engizilgen shekteýlerge baılanysty «Agrarlyq nesıe korporasııasy» AQ qaryz alýshylarynyń ósim men aıyppulyn esepteýdi toqtatqanyn da aıta ketý kerek.
Prezıdent málimdemesinen keıin tıimdi mindettemelerdi júzege asyrýǵa tez arada kirisip ketken «Agrarlyq nesıe korporasııasy» AQ klıentteriniń kez kelgen másele boıynsha habarlasýy úshin 5115 jedel jelisin iske qosty. Keıinge shegerý ótinimderin kásiporynnyń qarjylyq jaǵdaıy qıyndaǵanyn rastaıtyn qujattardyń kóshirmesimen birge korporasııanyń elektrondy poshtasyna jiberýge bolady. Baspasóz qyzmetiniń habarlaýynsha, kásipkerlerden túsken ótinish 10 kún ishinde qaralady.
