О́ńirlik kommýnıkasııalar qyzmetiniń málimetine súıensek, bul úshin demeýshiler men belsendi kásipkerler tartylǵan. Sonyń ishinde «Munaıservıs» JShS-niń basshylyǵy 156 myń maskaga jetetin 12 000 metr mata satyp alyp bergen. Bul matadan birneshe kásiporyn («Sari Suppliers», «Safety Systems», «Mastertex», «Sańyraýlar qoǵamy О́K», «ERTRI» JShS) men erikti jastar toby maskalardy tegin tigýde. Búginge deıin 12 myń maska tigilip, áleýmettik álsiz top múshelerine, aldyńǵy shepte qyzmet kórsetip júrgen azamattarǵa tegin taratyla bastady.
Oblys ákiminiń orynbasary Erjan Ábilhanovtyń aıtýynsha, oblys ákimdigi buǵan deıin iri kompanııalardy tartyp, óńirdiń medısınalyq qyzmetkerlerine qajetti qural-jabdyqtar alǵan. Endigi kezekte áleýmettik áljýaz toptar men aldyńǵy shepte júrgenderdi tegin maskamen qamtamasyz etý jumysy júrgizilýde. Aldaǵy ýaqytta mundaı sharalar jalǵasyn tabady.
Ákimdiktiń tegin maska tigip taratý sharasyna atsalysqandardyń biri – 32 jumysshysy bar «Master Tex Atyrau» JShS-niń dırektory Bolatbek Tóleýbektiń aıtýynsha, kásiporyn kún saıyn 800 qorǵanysh maskasymen birge, oblystaǵy medısına qyzmetkerlerine arnalǵan kombınezon da tigip jatyr.
– Qazaqstan Prezıdenti Qasym-Jomart Toqaev otandyq bıznesti qazirgi qıyn kezeńde koronavırýs ınfeksııasymen kúreske kómektesýge shaqyrǵan bolatyn. Bizdiń kásiporynda 20 tiginshi táýligine 800-ge deıin qorǵanysh maskasyn tigedi. Búginge deıin 12 myń danadan astam maska daıyndaldy. Olar muqtaj jandarǵa tegin taratylýda. Sonymen qatar, aýrýhanalardaǵy dárigerlerge de bir rettik qorǵanysh kombınezonyn da tigemiz,-deıdi Bolatbek Tóleýbek.
Maskalar eriktiler uıymy men áleýmettik qamsyzdandyrý basqarmalary men bólimderi arqyly taratylýda. Sondaı-aq, oblysta jeke kásipkerler, kásiporyndar men jekelegen azamattardyń tigip, satyp jatqan maskalaryna monıtorıng júrgizilýde. Qazir oblysta shamamen kúnine 25 myń maska tigilip, satylýda.
Joldasbek Kósherbaıuly
