Almaty qalasynyń bir turǵyny koronavırýs indetine shaldyǵýyna baılanysty óz-ózine qol salǵany týraly vıdeo jarııalap, taratyp jibergen. Keıinnen ol polısııaǵa bul áreketti ishi pysqannan jasaǵanyn, vıdeony tek jaqyn dostaryna ǵana taratqanyn aıtyp, kópshilikten keshirim surady.
Shyǵys Qazaqstan oblysy, Ereımentaý qalasynyń bir turǵyny jergilikti tótenshe jaǵdaı kezinde tórt kásipkerge Pavlodardan tómen baǵada jemis-jıdek jetkizip beremin dep, 66 myń teńgesin alyp, qashyp ketken. Keıinnen polısııa alaıaqty Esil aýdanyndaǵy bir qonaq úıde jatqan jerinen ustady.
Al, petropavldyq bir kásipker ınternet saýda arqyly 7 myń medısınalyq maskaǵa tapsyrys berip, jetkizip berýshiniń esep-shotyna 400 myń teńge aýdaryp jibergen. Aqshany alǵan adam sodan izim-qaıym joq bolǵan. Qazir ony polısııa izdestirip jatyr.
Almaty qalasyndaǵy 28 panfılovshylar saıabaǵynda kepterlerdiń jappaı qyrylǵany týraly vıdeo tarady. Jurt muny qalada júrgizilgen dezınfeksııa jumystarynyń zııany dep joramaldady. Al, Orman sharýashylyǵy jáne janýarlary álemi komıtetiniń baspasóz hatshysy Sáken Dildahmet kepterlerdiń áldeneden ýlanyp ólgenin, arnaıy saraptama bárin anyqtaıtynyn jetkizdi.
Qostanaı oblysy Uzynkól aýdany Ershov aýylynyń ýchaskelik ınspektory karantın kezinde ábden erikse kerek, dosy ekeýi ázil úshin vıdeo túsirip, WhatsAp jelisi arqyly taratady. Iаǵnı, vıdeoda eki dos aýyldaǵy úılerdiń birinen 28 jyl buryn jasyrylǵan spırt toly bóshke taýyp alady. Spırtti jaǵyp kórgen olar «Bizdi endi koronavırýs almaıdy» dep máz bolady. Biraq, bul ázilge oblystyq polısııa departamenti kúle almady. Ýchaskelik ınspektordy birden jumystan shyǵaryp jiberdi.
Egıpetten oralǵan qaraǵandylyq erli-zaıyptar eki aptalyq karantınge aýrýhanaǵa jatqysy kelmeı, ábden qıǵylyq saldy. «Sap-saýmyz, esh jerimiz aýyrmaıdy» dep azar da bezer bolǵan olardy dárigerler kóndire almaı, aqyrynda kópqabatty úıdegi páteriniń balkonyna polısııa órt sóndirý kóliginiń satysy arqyly kóterildi. Erli-zaıyptylar osydan keıin ǵana aýrýhanaǵa jatýǵa májbúr boldy.
Al, osynyń aldynda qaraǵandylyq taǵy bir azamat karantınde jatqan áıeliniń palatasyna tereze arqyly kirgen. Sol kúni kún sýyq bolǵandyqtan ábden tońyp qalǵan 36 jastaǵy jigit Germanııadan ushyp kelgen áıeline jeke zattary men temekisin tereze arqyly kirip beripti. Onda da birden shyǵyp ketpeı bólmede biraz jylynǵan kórinedi. Qaraǵandylyq azamat sot sheshimimen on táýlikke qamaýǵa alyndy.
El astanasynda karantın aýmaǵyn arǵy bettegi dúkennen araq alyp kelý úshin buzǵan azamat ustaldy.
О́skemen qalasynyń bir turǵyny táýlik boıy jumys isteıtin 1406 call-ortalyǵyna telefon shalyp, óziniń Taılandtan oralǵanyn, boıynda koronavırýs belgileri baıqalǵanyn aıtqan. Keıinnen arnaıy mamandar 39 jastaǵy bul azamattyń densaýlyǵy sap-saý ekenin, eshqandaı shetelge shyqpaǵanyn, telefon soqqan kezde mas bolǵanyn anyqtady. Oǵan aıyppul salyndy.
Arnaıy sehta maska tigýge kirisken Pavlodar oblysyndaǵy AP-162/3 mekemesinde jazasyn óteýshi bir azamat eń alǵashqy 20 maskany óziniń otbasyna salyp jiberdi. «Men osy jerde tigin tigýdi úırendim, qazir osy mekemedegi qyzmetkerleri úshin maska tigip jatyrmyn. Biraq, jalaqymnyń esebinen 20 maskany otbasyma jiberý týraly basshylyqqa ótinish jasadym. Men otbasymdy qatty saǵyndym jáne olardy óte jaqsy kóremin» dedi jazasyn óteýshi. 20 maska sottalýshynyń áıeli men qyzyna jetkizildi.
Almatyda bir jigit qoqys tasıtyn kóligine adam jasyryp, blok posttan alyp ótpekshi boldy. Mundaı jaǵdaı Almaty qalasynda birneshe márte qaıtalandy.
Tótenshe jaǵdaı jarııalanǵanyna qaramastan Tarazda bir úı kelin túsirip, betashar toı istedi. Asaba jigit «Koronavırýs ket, ket...» dep án salyp, jurtty bıletken toıdyń vıdeosy áleýmettik jelilerde keńinen tarady. Betasharǵa ájepteýir halyq jınalǵan. Toı ıesi bes táýlikke qamalyp, polısııa asabaǵa eskertý jasady.
Jambyl oblysy, Jýaly aýdany, Nurlykent aýylynyń bir turǵyny altynshy balasynyń dúnıege kelý qurmetine baılanysty jurtty jınap, kókpar berdi.
Almaty oblysynyń taksısteri jolaýshy tasymaldaýdyń jańa shemasyn oılap tapty. Iаǵnı, Almaty qalasy men Almaty oblysynyń shekarasynda ornalasqan eldimekender kóp bolǵandyqtan taksıster óz jolaýshylaryn blokpostqa jaqyn mańdaǵy úılerdiń birine jetkizip, úı ıesi jolaýshylardy óz ýchaskesi arqyly qalaǵa ótkizip jiberip otyrǵan. Jolaýshylardy arǵy jaqta basqa taksı kútip turady. Osylaısha bir úıdiń sharbaǵy kishigirim kedendik pýnktke aınalyp, quqyq qorǵaý qyzmeti anyqtaǵansha eki jaqqa da jolaýshylar toqtaýsyz óte bergen. Bul qyzmeti úshin taksıster de, jer ýchaskesiniń ıeleri de ájepteýir aqsha alypty. Tipti, adam basyna 5 myń teńgeden alǵan taksıster óz qyzmetterin jarnamalap, WhatsAp jelisi arqyly habarlandyrý bergen.
Almaty qalasynda kólik qozǵalysynyń azaıyp qalýy bir jigitterge keremet ıdeıa bergen sııaqty. Megapolıstiń kúretamyry ispettes ál-Farabı dańǵylynyń ústinde keshke bireýler ot jaǵyp, káýap pisirgen. Iаǵnı, týra kósheniń ústinde jeńil kóliginiń júk salǵyshynyń esigin ashyp qoıyp, kók tútindetip káýap pisirip jatqan jas jigitterdiń vıdeosy tarady. Polısııa kógildir kóktemniń keshinde «maevkaǵa» shyqqandardy tez anyqtap, onyń bireýi 15 táýlikke qamaýǵa alyndy.
Al, qapshaǵaılyq jastar 23 naýryz túngi saǵat 22:00 shamasynda Almaty-О́skemen tasjolynda avtokólik jarysyn uıymdastyrǵan. Qapshaǵaı qalalyq sotymen quqyq buzýshy S. kináli dep tanylyp, oǵan jaza retinde, 26510 teńge ákimshilik aıyppul salyndy.
Almaty oblysynda bir áıel ózin jurtqa «áleýmettik sala qyzmetkerimin» dep tanystyrǵan. Sóıtip karantınge baılanysty arzan azyq-túlik jetkizip beremin dep, 73 jastaǵy zeınetkerdiń 100 myńǵa jýyq teńgesin alyp, ushty-kúıli joq bolyp ketipti. Keıinirek polısııa bul áıeldiń ústinen buǵan deıin bes márte qylmystyq is qozǵalǵanyn anyqtady. Bul joly da alaıaq áıel qolǵa túsip, qarııanyń qarjysyn qaıtaryp berdi.
Segiz jylǵa sottalyp, Pavlodardyń túrmeleriniń birinde jazasyn ótep jatqan Aleksandr Skype baılanysy arqyly súıiktisine sóz saldy. Onyń súıiktisiniń esimi Natalıa eken. Tótenshe jaǵdaı jarııalanýyna baılanysty ǵashyǵymen jaqyn arada jolyǵýdyń sáti túspeıtinin ańǵarǵan Aleksandr túrme basshylyǵymen kelisip, osyndaı qadamǵa barypty. Endi aldaǵy ýaqytta Aleksandr men Natalıa onlaın arqyly nekege turýdy josparlap otyr. Ázirge jigit óz qolymen neke saqınasyn jasap, poshta arqyly salyp jiberdi. Aıtpaqshy, túrme basshylyǵy sottalýshylar men olardyń otbasy Skype baılanysy arqyly bir-birlerimen sóılesýge bolatynyn jetkizdi.
Qostanaı qalasynda avtobýs júrgizýshisi jolaýshylardyń birine «Maska kımeısiń be?» dep aıtqany úshin soqqyǵa jyǵyldy. Kóp uzamaı 31 jasar buzaqy ustalyp, qazir tergeý jumystary júrip jatyr.
Taraz qalasynda blok postta tártipke baǵynǵysy kelmegen bir azamat polısııaǵa dene jaraqatyn saldy. Polısııa qyzmetkeriniń betinen birneshe márte soqqy jasaǵan Taraz turǵyny buryn birneshe márte sottalǵan eken.
Aqtaý qalasynyń bir turǵyny podeziniń karantınge jabylyp jatqanyn kórip, úshinshi qabattan sekirip ketken. Biraq, ońbaı qulap, omyrtqasyn zaqymdap aldy. Bul podezden koronavırýs juqtyrǵandar anyqtalǵan eken.
Áleýmettik jelilerde Aqtaý qalasyndaǵy kópqabatty úılerdiń biriniń sýretteri tarady. Sýretterde podezden shyǵatyn esik dánekerlenip, astynan kishkentaı tesik qaldyrylǵan. Iаǵnı, bul úıdiń turǵyndary syrtqa shyǵa almaıdy, al, kishkentaı tesik syrttan zattar alý úshin arnaıy jasalǵan kórinedi. Jergilikti ákimdik bul úıdiń tóńireginde dezınfeksııa jumystary júrgizilgenin aıtty. Syrtqy esiktiń tek bekitkishi ǵana dánekerlengen. Al, kishkentaı tesik turǵyndarǵa yńǵaıly bolý úshin jasalypty. Iаǵnı, bul úıdiń turǵyndary syrtqa shyqqysy kelmeıdi, óıtkeni, olardy sýretke túsirýi múmkin. Kishkentaı tesik syrttan zat alyp turý úshin arnaıy oıylypty.
Temirtaý qalasynda karantınge baılanysty bankke kire almaǵan bir áıel qolyna pyshaq alyp, ótip bara jatqan jolaýshylarǵa tura júgirgen.
37-jastaǵy azamat Shý stansasynan Atyraýǵa baratyn júk poıyzyna jasyrynyp minip ketken. Qyzylordada polısııa túsirip aldy.
«Tótenshe jaǵdaı kezinde 700 myń teńge áleýmettik kómek beriledi» degen jarnamamen bireýler adamdarǵa telefon shalyp, jeke kýálik, salyq tóleý nómiri sııaqty jeke aqparattaryn suraı bastaǵan. Polısııa bularǵa aldanyp qalmaýdy eskertti.
Toǵyz adammen stol tennısin oınap, karantıen rejimin buzǵany úshin Ulttyq banktiń Aqmola oblystyq fılıalynyń dırektory úsh táýlikke qamaldy. Olardyń eshqaısysynda maska bolmaǵan.
«42500 teńge járdemaqy beremiz» degen jalǵan telegram-bot paıda boldy. Alaıaqtar ol aqshany alý úshin aldymen Biryńǵaı áleýmettik tólem tóleý qajet ekenin aıtyp, áldebir esep-shottardy jibergen.
Almaty qalasy, Jetisý aýdandyq ákimdiginiń qyzmetkerleri 280 myń teńge kóleminde para alyp, turǵyndardyń ary-beri ótýine ruqsat bergen. Kúdiktiler qamaýǵa alyndy.
Jambyl oblysynyń bir taksısti kóliktegi óz ornyn polıetılen klenkasymen qorshap alyp, jolaýshylar tasymaldaýdy jalǵastyra bergen. Bul qaýipti indetten barynsha saqtanǵan túri bolsa kerek.
Nur-Sultan qalasyndaǵy Mınıstrler úıiniń mańynda qoıandar júrgeni týraly vıdeolar paıda boldy. Shamasy aq qoıandar Aq ordaǵa jaqyn jerdegi ormannan kelgen sııaqty.
Bir jaqsysy, karantın kezinde barlyq óńirler men qalalarda qylmystyq oqıǵalar azaıdy.
