Sol kezde keńestik kezende osyndaı ispetti organ bolǵan joq. Atalmysh Jarlyqpen quqyq qorǵaý organdary júıesin reformalaý máselelerin qaraý jónindegi memlekettik komıssııa quryldy.
Qysqa merzimniń ishinde áskerı polısııa týraly ereje ázirlenip, bekitildi. Oǵan sáıkes Qarýly Kúshter quramyndaǵy qurylǵan organ óz mindetteri men fýnksııalary berildi.
Fýnksııanyń birinshi kezeńderinde olardyń mindetteri áskerı kólik quraldarynyń jol qozǵalysy qaýipsizdigin qamtamasyz etýmen, patrýldeýmen, áskerı qyzmetshilerdi izdestirýmen jáne áskerı qylmystardy anyqtaýmen shekteldi. Áskerı polısııa organdary qoıylǵan mindetterdi oryndaýǵa bilek-sybana kirisip ketti. Nátıjesinde quqyq buzýshylyqtar men qylmystardyń sany qysqardy.
Tájirıbe jınaı kele áskerı polısııanyń mindetteri men fýnksııalarynyń aýqymy keńeıtile bastady. Ol Qarýly Kúshterde sybaılas jemqorlyqqa qatysty quqyq buzýshylyqtardyń aldyn alý boıynsha ókilettikke ıe boldy. Endi onyń quzyryna buryn garnızon bastyqtarynyń qaramaǵynda bolǵan gaýptvahtalar berildi. Kınologııalyq qyzmettiń paıda bolýy mańyzdy boldy. Ony talap etiletin joǵary deńgeıge shyǵarý úshin orasan zor jumys atqaryldy. Qazir kınologtar men qyzmettik ıtterdiń kásibıligi Qazaqstanda tanylyp, halyqaralyq deńgeıde baǵalandy. Oǵan áskerı halyqaralyq oıyndardaǵy kınologııalyq bólimsheler arasyndaǵy «Adal dos» saıysynda ıe bolǵan júldeli oryndary dálel bolyp otyr.
2019 jyldyń tamyzynda áskerı polısııa organdarynyń qyzmeti áskerı qyzmettiń qaýipsizdigin qamtamasyz etýmen tolyqtyryldy. Osy maqsatta jeke basqarma quryldy, oǵan barlyq áskerı bólimderde, jergilikti áskerı basqarý organdarynda áskerı qyzmet qaýipsizdigin baqylaý boıynsha mindetter, sondaı-aq barlyq yqtımal táýekelderdi azaıtý boıynsha aldyn alý jumystaryn júrgizý júktelgen. Baqylaý sharalary barysynda osy basqarmanyń qyzmetkerleri áskerı qyzmetshilerdiń ómiri men densaýlyǵyna, qorshaǵan ortaǵa nemese jergilikti halyqqa, zalal keltire alatyn áskerı qyzmettiń barlyq salalaryn tekseredi. Tekserý qorytyndysy boıynsha áskerı polısııa buzýshylyqtardy joıý jóninde usynymdar berip, keıin qaıta baqylaý júrgizedi.
Qazaqstan áskeriniń kúndelikti qyzmetin áskerı polısııanyń qatysýynsyz elestetý múmkin emes. Onyń qyzmetiniń oń nátıjeleri eldiń qorǵanys qabiletin qamtamasyz etýge úlken úles qosady. Búgingi kúni tótenshe jaǵdaı rejımi men Qazaqstanda qabyldanǵan karantındik sharalar jaǵdaıynda áskerı polısııa Qarýly Kúshterdiń basqa bólimshelerimen qatar qoǵamdyq quqyqtyq tártipti qamtamasyz etýge belsendi qatysýda. Tájirıbeli áskerı polısııa qyzmetkerleri blokbeketterde qyzmet atqarýǵa, eldi mekenderdi birlesip patrýldeýge qatysýda.
