Jumys babyndaǵy saparmen Aqmola oblysyna kelgen Tabıǵı monopolııalardy retteý agenttiginiń tóraǵasy Murat Ospanov Kókshetaý jáne Stepnogor qalalarynyń óndiris oshaqtarynda boldy.
Jumys babyndaǵy saparmen Aqmola oblysyna kelgen Tabıǵı monopolııalardy retteý agenttiginiń tóraǵasy Murat Ospanov Kókshetaý jáne Stepnogor qalalarynyń óndiris oshaqtarynda boldy.
«Kókshetaý-Energo» JShS qaraýyndaǵy 110/10 kılovatt transformator stansasyndaǵy kezdesýde seriktestiktiń bas dırektory Berik Aqylbekov ınvestısııalyq jobalardy júzege asyrý barysy jaıly habardar etti. Málimetterdi shashyratpaı, atalǵan stansaǵa qatystysyn aıtsaq, 1987 jyly paıdalanýǵa berilgen qýat kózine byltyr 60 mıllıon teńgege jýyq ınvestısııa tartylǵan eken. Osynyń arqasynda KRÝN-10 qýat taratqyshynyń maı ajyratqyshtaryn vakýýmdyq júıege aýystyrýǵa múmkindik týdy. Qazir bul stansa turǵyndar tyǵyz ornalasqan Vasılkov, Sentralnyı jáne Kóktem shaǵyn aýdandaryn elektr qýatymen qamtamasyz etedi. Qyzmettiń sapasy jaqsaryp, paıdalanýǵa jumsalatyn qarjy shyǵyny azaıǵan.
Agenttik tóraǵasy «Kókshetaý jylý» jáne «Kókshetaý sý arnasy» kásiporyndarynda esepteý quraldarynyń ornatylý barysy men qýat kózderiniń tıimdiligin arttyrýǵa baǵyttalǵan ınvestısııalyq baǵdarlamalarǵa den qoıdy.
«Nur Otan» HDP Aqmola oblystyq fılıalynda «Tarıftik ashyq saıasattyń basym baǵyty» atty dóńgelek ústel májilisi ótkizilip, agenttik tóraǵasynyń orynbasary Asylbek Dúısebaev elimizdegi tarıftik saıasatty jetildirý týraly baıandama jasady. Sondaı-aq, qalany elektr qýatymen, jylý jáne sýmen qamtamasyz etý kásiporyndary basshylarynyń tarıfterdiń ósýinen túsken aqsha qarajatynyń tıimdi jumsalýy, baǵdarlamalardyń oryndalýy týraly esepteri tyńdaldy.
Baqbergen AMALBEK,
«Egemen Qazaqstan».
Aqmola oblysy.
