- «Maqtansań – shákirtińmen maqtan» demekshi, mundaı jastar óz aramyzda, olardyń biri – ynta qoıyp, tapsyrylǵan iske erekshe yqylaspen kirisetin shákirtim, «Munaı gaz isi» mamandyǵynyń 4-kýrs stýdenti Amanııazov Ermek. Kúni keshe Konrad Adenaýer qory uıymdastyrǵan Sur-Place baǵdarlamasy aıasyndaǵy respýblıkalyq konkýrstyń stıpendıaty atandy, atalǵan konkýrsqa qatysyp, aqpan aıynda Aqtóbe qalasynda osy qor ókildiginiń dırektory Tomas Helmmen suhbatqa qatysyp kelgen bolatyn, deıdi «Munaı gaz ınjınırıngi» kafedrasynyń dosenti M.Karajanova.
Aıta keterlik, Qazaqstandyq JOO-darynyń stýdentterine arnalǵan jergilikti granttardyń Sur-Place baǵdarlamasy 2007 jyldan beri Qazaqstannyń jas elıtasyn qoldap keledi. K.Adenaýer qory elimizdegi azamattyq qoǵam uıymdarymen, ýnıversıtettermen, saıası partııalarmen jáne jekelegen elıtalarmen tyǵyz baılanysta jumys jasaı otyryp, aımaqtyq jáne jahandyq saıası áriptestikti damytýǵa negizdelgen. Bul qor baǵdarlamasynyń negizgi maqsaty jastardyń oqýda óz qabiletterin ashý ǵana emes, óz bilimin, kúshi men bastamasyn óz eliniń saıası jáne áleýmettik ómirine qatysýǵa arnaýǵa umtylatyn daryndy jastarǵa qoldaý kórsetý. Qatysýshylardy irikteý eldiń qoǵamdyq-saıası ómirine belsendi qatysatyn jeke ómirlik nyq ustanymy, dúnıetanymy keń jáne aıqyn maqsaty bar stýdentterdi anyqtaý negizinde júrgiziledi. Qordyń basym baǵyttary saıasat jáne BAQ, jergilikti ózin-ózi basqarý, saıası bilim bolyp, tehnıkalyq salalarǵa salystyrmaly túrde az nazar aýdarylatyndyqtan jáne tapsyrys bergen 400 kandıdat ishinen iriktelgen 30 shaqty stýdent arasynan tabylǵan Ermektiń bul jetistigi, árıne, ustazdary úshin qýanarlyq jaıt.
Ustazdarynyń úkili úmiti Ermek 2017 jyly KazEnergy jáne Shell kompanııalarynyń uıymdastyrýymen Student Energy Challenge atty respýblıkalyq ǵylymı jobalar baıqaýynda júldeli oryn alsa, sol jyly Aqtaý qalalyq mádenıet jáne tilderdi damytý ortalyǵynan tuńǵysh Prezıdent kúnine oraı ótkizilgen «Tuńǵysh Prezıdent jáne meniń Otanym» atty qalalyq shyǵarma jazý baıqaýynda 2-shi oryndy ıemdendi. 2019 jyly 31 naýryzda TShO jáne NCOC munaı kompanııalarynyń jáne SPE qaýymdastyǵynyń uıymdastyrýymen ótken Halyqaralyq «Atyrau International Petroleum Olympiad» tehnıkalyq olımpıadasynda toptyq esepte 1-shi oryndy ıemdenip, marapat retinde NCOC kompanııasynda óndiristik tájirıbeden ótip keldi. Qatysqan sharalardyń ózektiligi, maqsaty, mindetteri, usynystary týraly oı tujyrymdap, erekshe mán berýi onyń odan ári qanattanyp, bıik belesterden kórinýine birden-bir sebepshi boldy.
- Shákirtimizdi maqtan ete otyryp, onyń kásibı maman bolyp qalyptasýymen qatar, elimizdiń bolashaǵyna, birlikke, jasampaz tirlikke qyzmet etýine úlken úmitimiz bar, - deıdi ustazy M.Karajanova.
