Epıdemııaǵa qarsy is-sharalarǵa qatysatyn medısına qyzmetkerlerine qarjylyq qoldaý kórsetý maqsatynda densaýlyq saqtaý qyzmetkerleriniń jalaqysyna ústemeaqy belgileý erejesi ázirlengeni belgili, onda táýekel toptary, alýshylardyń tizimin qalyptastyrý tártibi jáne tólem mólsheri anyqtalǵan bolatyn.
A.Jumaǵulovtyń aqparaty boıynsha, Densaýlyq saqtaý mınıstriniń 4 sáýirdegi buıryǵyna sáıkes 3 táýekel toby anyqtalyp, medısınalyq qyzmetkerlerdiń tizimin qalyptastyrý tártibi jáne tólem mólsheri bekitilgen.
«Mysaly, birinshi topqa koronavırýsy bar pasıentterge medısınalyq kómek kórsetý úshin anyqtalǵan reanımasııa bólimsheleri men basqa da stasıonarlardy qosa alǵanda, ınfeksııalyq stasıonarlardyń dárigerleri, orta jáne kishi medısınalyq qyzmetkerleri kiredi. Ústeme jumys istegen kezeńge tepe-teń aıyna 20 ese eń tómengi jalaqy mólsherinen (850 myń teńge) aspaıdy, ekinshi topqa provızorlyq stasıonarlardyń dárigerleri, orta jáne kishi medısınalyq qyzmetkerleri, sondaı-aq jedel medısınalyq járdemniń dárigerleri men feldsherleri, onyń ishinde ambýlatorııalyq-emhanalyq uıymdar janyndaǵy (shuǵyl shaqyrýdyń 4 sanaty týraly sóz bolyp otyr), sondaı-aq olar tartylǵan jaǵdaıda sanıtarlyq avıasııanyń dárigerleri men orta medısınalyq qyzmetkerleri, olarǵa ústeme aıyna 10 ese eń tómengi jalaqy mólsherinen aspaıdy (425 myń teńge), al úshinshi topqa dárigerler, karantındik stasıonarlardyń orta jáne kishi medısınalyq qyzmetkerleri, jedel medısınalyq kómek brıgadalarynyń júrgizýshileri, sondaı-aq epıdemııaǵa qarsy is-sharalardy júrgizýge tikeleı qatysatyn zerthanalardyń mamandary, SES qyzmetkerleri, epıdemııaǵa qarsy is-sharalarǵa baılanysty bıologııalyq materıaldy alý úshin JRVI, pnevmonııasy bar pasıentterdi qabyldaýǵa belgilengen shuǵyl stasıonarlardyń jáne jedel-járdem medısınalyq emhanalary uıymdarynyń qabyldaý bólimsheleriniń qyzmetkerleri, jedel shtabtardyń músheleri, blok-beketterde karantındik rejimdi qamtamasyz etetin densaýlyq saqtaý qyzmetkerleri kiredi, ústemeaqy aıyna 5 ese eń tómengi jalaqy mólsherinen aspaıdy (212 myń teńge). Ústemeaqy alýshylardyń tizimderin óńirlik komıssııalardyń jedel shtabtary qalyptastyrady, olardyń tóraǵalary bolyp óńirler ákimderiniń orynbasarlary taǵaıyndalady. Komıssııalardyń quramyna densaýlyq saqtaý basqarmalarynyń, óńirlik, Bas memlekettik sanıtarlyq dáriger, úkimettik emes uıymdardyń ókilderi kiredi. Ústemeaqy respýblıkalyq bıýdjet qarajaty esebinen júrgiziledi. Qor tólemderdi komıssııalar beretin tizimder boıynsha júrgizedi», dedi ol.
Sonymen qatar A.Jumaǵulov óz sózinde atap ótkendeı, jalpy epıdemııaǵa qarsy is-sharalarǵa tartylǵan medısınalyq qyzmetkerlerdi qarjylaı qoldaýǵa 35,7 mlrd teńge bólingen. Naýryz aıynda 17,4 myńnan astam medısına qyzmetkerlerine 3,3 mlrd teńgeden astam qarjy aýdarylǵan. Eń úlken soma Almaty men Nur-Sultan qalasynyń medısına qyzmetkerlerine (shamamen 1,9 mlrd teńge) tólengen.
«Eń kóp ústemeaqy úshinshi sanat boıynsha tólendi – shamamen 9 myń qyzmetkerge 846 mln teńge. Ekinshi táýekel toby boıynsha 1,8 mlrd teńgeni 7 myń medısına qyzmetkeri aldy. Birinshi sanattaǵy 1 400 medısına qyzmetkeri 717 mln teńge aldy. Onyń ishinde 2,5 myń emhana qyzmetkerleri jalpy somasy 185 mln teńgege, sondaı-aq «Jedel járdem» brıgadalarynyń 4 myń qyzmetkeri jalpy somasy 1,2 mlrd teńgege yntalandyryldy», dedi A.Jumaǵulov.
