Qalalyq bılik ókilderi azamattardyń ómiri men densaýlyǵyn saqtap, koronavırýs ınfeksııasynyń taralýyna jol bermeý úshin qajetti barlyq sharalardy qolǵa alýda.
20 sáýirden bastap keıbir kásiporyndardyń jumysyn jalǵastyrýǵa ruqsat berilgendikten, kóshedegi kólik qozǵalysy 10%-ǵa artty.
Qalalyq jedel shtab sheshimimen óz jumysyn qaıta bastaıtyn kásiporyndar sany kóbeıdi. Bul tizimdi avtokólikterge tehnıkalyq qyzmet kórsetý, výlkanızasııa, avtosalon sııaqty jumys oryndary tolyqtyrdy.
Jumys jaǵdaıynda avtokólik salonynda tek júrgizýshi ǵana bolýy kerek. Sondaı-aq agrotehnıkalyq salada da jumys isteýge ruqsat etilgen. Degenmen ár uıym óz qyzmetkerleriniń jumysqa kelýi men keri qaıtýyn uıymdastyrýǵa mindetti.
Polısııa kóbine jeke tulǵalardyń jeńil avtokólikterin toqtatady. Uıymdardyń jumys ýaqyty 18:00-de aıaqtalady. Kúndiz «Sergek» beınebaqylaýynyń taldaý nátıjesi boıynsha, trafıktiń tolyq baqylaýy qajet bolǵan jaǵdaıda mobıldi posttar ornatylady. Saǵat 20:00-den keıin mobıldi posttarda kólik qozǵalysy 100% tekseristen ótedi.
Búgingi tańda 1 125 kólik aıyppul turaǵyna qoıyldy. Saǵat 22:30-ǵa deıin tek azyq-túlik satyp alýmen aınalysatyn kólikter ǵana júre alady. Al, saǵat 23.00-den keıin dezınfeksııa jumystary úshin kólik qozǵalysyn 5%-ǵa deıin tómendetý josparlanǵan. Polısııa qyzmetkerleriniń jumysy turǵyndarǵa karantın talaptaryn saqtaýdy túsindirýge baǵyttalǵan. Tótenshe jaǵdaı men karantın rejımin qasaqana buzǵan jaǵdaıda quqyq buzýshylarǵa zańǵa sáıkes naqty sharalar qabyldanady.
«Qurmetti qala turǵyndary, azamattardyń qaýipsizdigin qamtamasyz etý úshin karantın talaptaryn qatań saqtaýdy talap etemiz. Qabyldanǵan sharalarǵa túsinistik tanytyp, polısııa qyzmetkerleriniń zańdy talaptaryn saqtap, ınfeksııanyń aldyn alýǵa kómektesýlerińizdi suraımyz. Bul sharalardyń barlyǵy sizdiń jáne jaqyndaryńyzdyń densaýlyǵy úshin qabyldanyp jatyr», – deıdi polısııa qyzmetkerleri.
