Daǵdarysqa qarsy negizgi zańnamalyq túzetýlerdi talqylaý Májilis depýtattary, memlekettik organdar men «Atameken» UKP ókilderiniń qatysýymen beınekonferensııa formatynda ótýde.
Zań jobasy «Áleýmettik-ekonomıkalyq turaqtylyqty qamtamasyz etý jónindegi sharalar týraly» Qazaqstan Respýblıkasy Prezıdentiniń 2020 jylǵy 16 naýryzdaǵy Jarlyǵyn oryndaý maqsatynda ázirlendi jáne qazirgi ýaqytta elimizde tótenshe jaǵdaıdy engizýmen tikeleı baılanysty. Ulttyq ekonomıka vıse-mınıstri Aıgúl Shaımovanyń aıtýynsha, bul zań joba tótenshe jaǵdaı kezinde basqarý sheshimderin qabyldaý úshin qajetti shara bolyp tabylady.
Atap aıtqanda, Qazaqstan Respýblıkasy Prezıdentiniń aktilerine sáıkes tótenshe jaǵdaı kezinde eldiń ekonomıkalyq qaýipsizdigin qamtamasyz etý úshin mańyzdy qujattardyń qoldaný erekshelikteri belgilenýi múmkin. Olar: salyq, banktik, bıýdjettik, kedendik, eńbek, monopolııaǵa qarsy zańdar, sondaı-aq halyqtyn densaýlyǵyn saqtaý týraly jáne densaýlyq saqtaý júıesi týraly zańnamalar, memlekettik satyp alý týraly, valıýtalyq retteý týraly zańnamalar, azamattardy áleýmettik qorǵaý, memlekettik menshik salalary jáne t.b.
Sonymen qatar, A.Shaımovanyń aıtýynsha, tótenshe jaǵdaı kezinde jumys jaǵdaıyndaǵy qalyptasqan tájirıbeni eskere otyryp, Úkimet qosymsha zańnamalyq sharalar paketin engizedi. Qaraýǵa kelip túsken zań jobasynda «Tótenshe jaǵdaı týraly» jáne «Normatıvtik quqyqtyq aktiler týraly» zańdarǵa tótenshe jaǵdaı engizý kezinde qoldanylatyn negizgi sharalar men ýaqytsha shekteýlermen baılanysty tolyqtyrýlar bóliginde túzetýler usynylyp otyr.
Zań jobasyn talqylaý odan ári Májilistiń Ekonomıkalyq reforma jáne óńirlik damý komıtetiniń tóraǵasy Nurtaı Sabılıanov bastaǵan jumys tobynda jalǵasýda.
