Búgin Jambyl oblysynyń ákimi Berdibek Saparbaev ardagerdiń shańyraǵynda bolyp, Memleket basshysy Qasym-Jomart Toqaevtyń Quttyqtaý hatyn tapsyrdy. Qazaqstan Respýblıkasynyń Prezıdenti Qasym-Jomart Toqaev óz hatynda aǵa urpaq Tileýqabyl Tórebekovti mereıtoıymen quttyqtaıtynyn jetkizip, onyń ómir joly búgingi urpaq úshin úlgi-ónege bolyp tabylatynyn atap ótken.
Tileýqabyl Tórebekov Keńes Áskeriniń qatarynda mılıtarıstik Japonııamen soǵysqan erjúrek maıdanger. Al, soǵys aıaqtalǵan soń Jambyl oblysynyń damýyna úles qosty. 1950-1966 jyldar aralyǵynda ol oblystyq partııa komıteti birinshi hatshysynyń kómekshisi, bólim meńgerýshisi bolyp jumys istedi. Jambyl qalalyq partııa komıtetiniń ekinshi hatshysy, 1970 jyldan 1983 jylǵa deıin Jambyl qalalyq atqarý komıtetiniń tóraǵasy qyzmetin atqardy. Tileýqabyl Tórebekuly qurmetti demalysqa shyqqanda da qoǵamdyq jumystan tys qalǵan joq. 1995 jyldan 2015 jylǵa deıin oblystyq Ardagerler keńesin basqardy.
Ol III dárejeli Dańq, II dárejeli Otan soǵysy, Eńbek Qyzyl Tý, «Qurmet Belgisi» ordenderimen, 13 medalmen, onyń ishinde «Erligi úshin» medalimen marapattalǵan. Alty bala tárbıelep ósirgen.
Berdibek Saparbaev qarııamen áńgime barysynda ardagerdiń óńirdiń áleýmettik-ekonomıkalyq damýyna qosqan zor úlesin, onyń uıymdastyrýshylyq qabiletin jáne biliktilik qasıetterin atap ótti. Sonymen qatar, óńir basshysy Tileýqabyl Tórebekovti Uly Jeńistiń 75 jyldyǵymen quttyqtap, ardagerge 1 mıllıon teńgelik sertıfıkat tabys etti.
Jambyl oblysy
