Otyrysta Kókshetaý qalasynyń ákimi Amangeldi Smaıylov qalada júrgizilip jatqan jumystar boıynsha esep berip, salynyp jatqan «Bolashaq» saraıymen basqa da qurylystar, ınfraqurylymdyq nysandarǵa toqtaldy. Degenmen, óńir basshysy atqarylyp jatqan bul jumystarǵa kóńili tolmaıtyndyǵyn aıtyp, forýmǵa deıin barlyq qolǵa alynǵan jobalar der kezinde oryndalyp, iske qosylý kerektigin qatań tapsyrdy.
–«Bolashaq» saraıy – forýmǵa daıyndyq barysyndaǵy eń basty nysan. Onyń qurylysy men ishki bezendirilýi, salyný sapasy, mańaıynyń kóz tartarlyqtaı kórikti bolýy bárinen mańyzdy. Sondyqtan, ishindegi qoıylatyn jıhazdar men ornatylatyn qurylǵylarynyń árbireýine jete mán berilýi qajet. Sonymen birge, forým aıasyndaǵy nysandar boıynsha Nur-Sultan jáne basqa da aımaqtardan jumys isteýge keletin jumysshylardyń qazirgideı tótenshe jaǵdaı kezinde oıdaǵydaı qatynaý máselesin de durys qarastyryńyzdar,–deı kele, oblys basshysy óziniń orynbasarlaryna osy jóninde tapsyrmalar berdi.
Sondaı-aq bul jıynda óńir basshysy qala ákimine jáne óz orynbasarlaryna Kókshetaý qalasynyń joldaryn, sonyń ishinde Nazarbaev dańǵyly boıyndaǵy joldardy jańartý, turǵyn úı qurylysy, Qopa kóliniń aýmaǵyn kórkeıtý, qala ishimen ótetin Qylshaqty ózeniniń mańyn tazartý men abattandyrý sekildi jumystardy da naqty ýaqytynda aıaqtaýdy tapsyrdy. Forýmǵa qatysýshylardyń jıyn kezinde ýaqytsha turýyna arnaıy salynyp jatqan Nazarbaev dańǵylyndaǵy kópqabatty úıler boıynsha týyndaǵan zańdyq turǵydaǵy máselelerdi de tezdetip sheshýge tapsyrma berdi.
Eki el arasyndaǵy yntymaqtastyq forýmy kezinde oǵan qatysýshylar men qala qonaqtaryn abyroımen qarsy alyp, shyǵaryp salý úshin belgilengen jumystardyń qanshalyqty mańyzdy ekenin osyǵan jaýapty tulǵalar sanaly túrde barynsha uǵynyp, kózdelgen barlyq nysandardy sapaly ári ýaqytynda iske qosýlary qajettigin qatań eskertti.
