Beınekonferensııa rejıminde ótken otyrysta koronavırýs epıdemııasymen kúrestiń, ekonomıkany qalpyna keltirý men memlekettiń daǵdarystan keıingi damýynyń strategııalyq máseleleri qaraldy.
Elbasy jahandyq syn-qater aınalasyndaǵy jaǵdaı óte kúrdeli ekenin jetkizdi.
«Koronavırýs saldary álemdik ekonomıkanyń ómirlik mańyzdy júıelerine yqpal etedi. Halyqaralyq valıýta qorynyń sarapshylary bul jaǵdaıdy Uly daǵdaryspen salystyryp, «Uly karantın» dep atady. Olardyń málimetinshe, 170 elde jan basyna shaqqandaǵy tabys qysqarady. Bárinen buryn álsiz ekonomıkalar zardap shegedi. Bul toqsanda sarapshylar pandemııa men ekonomıkalyq daǵdarystyń bir ýaqytta sharyqtaıtynyn boljady. Bul - Ekinshi dúnıejúzilik soǵystan keıingi ónerkásiptik óndiristiń eń tómengi quldyraýy bolady» dedi Tuńǵysh Prezıdent.
Sonymen birge Nursultan Nazarbaev jaqynda álem elderiniń qıyn synaqtarǵa tap bolatynyn, Qazaqstan da bul máselelerden shet qalmaıtynyn atap ótti.
«20 sáýir kúni tarıhta alǵash ret munaı baǵasy keri ketti. Álemdik naryqta teńgerim joǵaldy. Pandemııa men óndiristik quldyraýdan keıin jahandyq qarjylyq daǵdarys bolady dep boljanǵan. Kelesi kezeń - álemdik azyq-túlik daǵdarysy bolýy múmkin. Bul birqatar shıelenis pen qarabalas týǵyzady» dedi Elbasy.
Qaýipsizdik Keńesiniń Tóraǵasy qıyn kezeńdi eńserý úshin Qazaqstannyń qazir jasap jatqan sharalarynyń sheshýshi mańyzǵa ıe bolatynyn basa aıtty. «Memleket basshysy men Premer-Mınıstr daǵdarysqa qarsy barlyq qajetti sharalardy qabyldady. Elimizde tótenshe jaǵdaı engizilip, karantın rejımi kúshine endi. Elimizdiń barlyq azamattaryn tótenshe jaǵdaı talaptaryn saqtaýǵa shaqyramyn. Bizdiń tarıhymyzda birneshe daǵdarys boldy. Biraq, qazirginiń jóni bólek. Árbir qazaqstandyq memlekettik qoldaýdy sezinýi úshin bárin jasaımyz. Sonymen birge, qazir bolashaqqa qaraýymyz kerek. Álem endi burynǵydaı bolmaıdy» dedi Nursultan Nazarbaev.
