Osy oraıda Jambyl oblysynyń ákimi Berdibek Saparbaev qala aktıvimen kezdesti. Basqosýda Taraz qalasynyń ákimi Aıtqazy Qarabalaev birqatar máselelerge jaýap berdi.
Qala turǵyndarynan qalalyq qyzmetter men tikeleı Taraz qalalyq ákimdiginiń jumysyna baılanysty 16 myńnan astam ótinish túsken. Áleýmettik jelilerde oblys ákimi Berdibek Saparbaevtyń atyna qalalyq ákimdiktiń qyzmetine qatysty 178 ótinish kelip tússe, olardyń 33-i ǵana oryndalǵan. Turǵyndardy negizinen qoǵamdyq kólik jumysynyń nasharlyǵy, avtobýs aıaldamalarynyń jaı-kúıi, jol jamylǵysy, qoqystyń, ashyq lıýkterdiń kóptigi, aǵashtardy zańsyz kesý jáne taǵy da basqa osy sekildi máseleler tolǵandyrýda. Berdibek Saparbaev jalpy oblys boıynsha túrli áleýmettik-ekonomıkalyq kórsetkishterdiń oryndalmaýy Taraz qalasy ákimdiginiń qyzmetimen baılanysty bolyp otyrǵanyn jetkizdi.
«Qalalyqtar ózderin tolǵandyrǵan máselelerin sheship berýdi ótinip oblystyq ákimdikke qońyraý shalyp, áleýmettik jeliler arqyly dabyl qaǵýda. Sebebi, uıymdastyrý jumystary álsiz, tıisti baqylaý joq», dedi Berdibek Saparbaev.
Sol sııaqty jolaýshylar kóliginiń turaqsyz qozǵalysy, eski jáne tar avtobýstardyń las jáne yńǵaısyz salondary, júrgizýshiler men kondýktorlardyń mádenıetsizdigi qala turǵyndarynyń kópten beri kóterip kele jatqan basty máseleleriniń biri retinde qaraldy. Oblys ákiminiń aıtýynsha, Taraz qalasynyń ákimine adamdardyń qajettilikterin eskere otyryp, marshrýttardy júıelendirý, jańa, syıymdy avtobýstar satyp alý máselesin sheshý, elektrondy bılettendirý men GPS-baqylaýdy engizý boıynsha tapsyrmalar júktelgen. Alaıda, áli kúnge deıin birde-bir tapsyrma oryndalmaǵan.
Taǵy bir másele – Tarazdyń Abaı, Qoıgeldi, Beıbitshilik jáne basqa da ortalyq kóshelerine qatysty bolyp otyr. Olardy jóndeý jumystary naýryz aıynda bastalý kerek bolǵanymen, jospar oryndalmaǵan. Oǵan ne kedergi bolǵany belgisiz. Jıynda osy sııaqty birqatar máseleler kóterildi.
О́z kezeginde Aıtqazy Qarabalaev bilikti kadrlardyń joqtyǵyn alǵa tartty.
Sonymen qatar, qala ákiminiń aıtýynsha, Abaı kóshesin jóndeý 2 mamyr kúni aıaqtalady dep josparlanýda. Sondaı-aq, jumystyń ýaqytyly bastalýyna jaýyn-shashynnyń kóptigi de áser etýde eken. Keńesti qorytyndylaı kele Berdibek Saparbaev negizgi aspektilerge nazar aýdardy. Taraz – Jambyl oblysynyń bet-beınesi, týrısterdi tartý ortalyǵy bolǵandyqtan, qala ákimdigine óńirdi damytý boıynsha zor jaýapkershilik júkteletinin atap ótti.
Jambyl oblysy
