«О́tinimniń kezeńderdiń birinde turyp qalýy máselesi tolyqtaı sheshildi. Buǵan qatysty saýaldyń múldem az ekendigin kórip otyrmyn. Árbir jaǵdaıdy qaıta tekserip shyǵamyz», - dep jazdy vıse-mınıstr Instagram paraqshasynda.
Osy rette ol birneshe máselege jeke-jeke toqtaldy. Birinshisi - tólem taǵaıyndalǵanyna bir aptadan astam ýaqyt ótkenimen, qarajat kómek alýshynyń esepshotyna túspeýi.
«Buǵan deıin aıtqanymdaı, aqsha is júzinde bir kúnniń ishinde jiberiledi. Biraq, esepshot qate kórsetilgen jaıttar bolyp turady. Kópshiligi: «men bárin durys kórsettim» deıdi. Alaıda aqsha jiberilgennen keıin bank keri qaıtaryp jibergen nemese ózimiz baıqap qalǵan shamamen 930 myń ótinim esepshoty qate (20 sımvoldan az jáne t.b.) kórsetilgen.
Sonymen, nelikten irkilis oryn alady? Prosess kelesideı:
1) Biz aqshany sizdiń banktegi esepshotyńyzǵa (1 kún) aýdaramyz.
2) Bank tekserip, esepshot qate bolǵanda aqshany keri qaıtarady (1 kún).
3) Biz ózimizdiń bazamyzdan aqshany aýdarý úshin ótinim berýshiniń basqa qoldanystaǵy esepshotyn izdeımiz. Máselen, siz basqa tólem alýyńyz múmkin. Muny sizdi barynsha mazalamaý úshin jasaımyz. Shamamen 900 myńyn taptyq (1 kún).
4) Eger tapsaq, aqshany qaıta jiberemiz (1 kún). Keıde adamdardyń basqa esepshotqa tústi deýiniń sebebi osynda. Aqsha joq dep aıtpastan buryn barlyq esepshottaryńyzdy tekserip alýdy ótinemin.
5) Eger tappasaq, SMS jiberemiz (keshe mundaı 28 myń SMS jiberdik). Oǵan jaýap retinde esepshot nómirin jiberý qajet (1 kún).
Munan ary sizdiń esepshotty qashan bergenińizge baılanysty. О́zderińiz kórip otyrǵandaı, prosess bir kúnnen kóp ýaqytty alady. Biraq, bul tólem aýdarýda problema oryn alǵan jaıttarda ǵana», - dedi ol.
Osy rette vıse-mınıstr kez kelgen qyzmettegideı bir nárse anyqtaý qajet bolsa, onda ol qosymsha ýaqytty alatyndyǵyn basa aıtady.
«Búgingi kúni tólem jasaýǵa 4 197 336 ótinim qoıyldy. Onyń ishinde 4 126 155 azamatqa tólem jiberildi. Qalǵan 71 181 ótinish boıynsha azamattardyń esepshotyna qarajatty der ýaqytynda aýdarý maqsatynda jumys júrgizilip jatyr. Buǵan deıin tólengen tólemder boıynsha banktermen qosymsha tekserý júrgizilýde. Biz bul jaǵdaıdy kúndelikti monıtorıngilep otyrmyz jáne qajet bolǵanda banktermen jáne prosesske jumyldyrylǵan ózge de uıymdarmen birden jumys isteımiz», - dedi Narıman Muqyshev.
