Koronavırýs • 27 Sáýir, 2020

«Myltyqsyz maıdandaǵy» dárigerler

103 retkórsetildi

Koronavırýs juqtyrǵandardy emdeý jaǵynan aldyńǵy shepte turǵan stasıonarlardyń biri – Nur-Sultan qalasynyń №3 kópbeıindi aýrýhanasy. Emdeý mekemesiniń búgingi tynys-tirshiligi men materıaldyq-tehnıkalyq bazasy jóninde aýrýhananyń bas dárigeri, medısına ǵylymdarynyń doktory Juldyz Danbaeva aıtyp berdi.

«Áleýmettik medısınalalyq saqtandyrý qory» KEAQ Nur-Sultan qalasy boıynsha fılıaly baspasóz qyzmetiniń bizge bergen aqparaty boıynsha, elordada qaıta qurylǵan №3 kópbeıindi aýrýhana – saqtandyrý qorynyń medısınalyq qyzmet jetkizýshileriniń biri. Onyń quramyna №3 perınataldyq ortalyq pen Dermatologııa bólimshesi (burynǵy teri-venerologııa dıspanseri) kiredi.

Koronavırýstyq ınfeksııanyń órshýine baılanysty munda 220 provızorlyq tósek-oryn jasaqtalypty. Qazirgi ýaqytta onda pasıentter emdelip jatyr. Bas dárigerdiń aıtýynsha,  osy provızorlyq stasıonarda qyzmet kórsetip júrgen dárigerlerge bólek tarıf belgilengen, ıaǵnı olar eńbegine oraı jalaqysynyń ústine Úkimet belgilegen ústemeaqysyn alady.

– Aýrýhananyń quramyna kiretin Perınataldyq ortalyq burynǵydaı jumys istep jatyr. Eger júkti áıelderdiń birinde jedel respıratorlyq vırýstyq ınfeksııanyń belgisi baıqalsa, olar jeke emdeledi. Olarǵa arnalǵan qosymsha observasııalyq tósekter ázirlep qoıdyq, – deıdi J.Danbaeva.

Al teri aýrýlary bar syrqattarǵa dárigerler qashyqtan keńes beredi. Mundaı pasıentter úshin stasıonar men emhanada eki-ekiden, tórt kezekshi dáriger jumys isteıdi. Degenmen de shuǵyl medısınalyq kómekti qajet etetin jaǵdaılar da bolmaı turmaıdy. Olar birden bólimshege jetkizilip, jedel taldaýlar jasalyp, qajet bolǵan jaǵdaıda, aýrýhanaǵa jatqyzylady eken. 

Bas dárigerdiń aıtýynsha, koronavırýstyń taralýyna baılanysty dárigerler men medbıkelerdiń jumysy burynǵydan da qaýyrt bolyp ketken. Bul aýrýhananyń aqjeleńdileri – koronavırýs órship turǵan elderden ushyp kelgen halyqaralyq reısterdi qabyldaǵan alǵashqy dárigerler.

– 21 naýryzdan bastap, elordaǵa ushyp kelgen halyqaralyq áýe reısterin qabyldap, jolaýshylardy koronavırýsqa tekserý bizdiń komandanyń enshisine tústi. Jumys táýlik boıy jalǵasty. Dárigerlerimizde tynym bolǵan joq. Olar úıin, otbasyn aptalap, aılap kórmeı, tikesinen tik turyp qyzmet etti. Keıin  «Ramada Plaza» otelin karantınde jatqan azamattarǵa arnap jasaqtaǵan soń, ondaǵy 800 oryndyq stasıonarda da medısınalyq qyzmet kórsettik, – deıdi bas dáriger.

Juldyz Seıitqamzaqyzyn biz joǵary sanatty bilikti dáriger retinde jaqsy bilemiz. El basyna túsken qıyn kezeńde ol bas dárigermin dep qol qýsyryp otyrǵan joq. О́zi de koronavırýs juqtyrǵan azamattardy emdeýmen aınalysyp, olardy psıhologııalyq-moraldyq turǵydan qoldap, aqyl-keńesin aıtyp otyrdy.

Koronavırýspen kúresip júrgen medısınalyq qyzmetkerlerdiń tıisti deńgeıde qorǵanys quraldarymen qamtamasyz etilmeýi keıingi kezde kóp synǵa ilinip júr. Al bizdiń áńgimemizge arqaý bolyp otyrǵan №3 kópbeıindi aýrýhananyń mamandary jeke qorǵanys jabdyqtarymen 100 paıyz tolyq qamtamasyz etilgen. Aýrýhananyń ózinde de indetti juqtyrǵandardy emdeýge arnalǵan qurylǵylardyń bári bar.

Sóziniń sońynda bas dáriger turǵyndardy saq bolýǵa shaqyryp, qoldy sabyndap jıi jýý, adam kóp shoǵyrlanǵan jerge barmaý, ara qashyqtyq pen tazalyqty saqtaý  – vırýsty juqtyryp almaýdyń eń basty sharty ekenin eske saldy.

Qymbat TOQTAMURAT

Sońǵy jańalyqtar

Abaı murasy Bishkekte talqylandy

Rýhanııat • Búgin, 20:36

«Adal bilim» jobalyq keńsesi quryldy

Qazaqstan • Búgin, 19:47

Baspanaly bolý múmkindikteri aıtyldy

Aımaqtar • Búgin, 18:15

Alakól jaǵalaýy abattandyrylyp jatyr 

Aımaqtar • Búgin, 17:44

ForteBank: Bir dollar – 388 teńge

Qazaqstan • Búgin, 15:35

Uqsas jańalyqtar