Búgin Nur-Sultan qalasy ákiminiń orynbasary Baqtııar Máken bilim berý uıymdarynyń basshylarymen keńes ótkizip, onyń aıasynda jańa oqý jylynda birinshi synypqa qabyldaý, qorytyndy attestattaý, UBT ótkizý tártibi, sondaı-aq kadrlyq qamtamasyz etý jóninde túsinikteme berildi. Keńes barysynda qalalyq bilim basqarmasynyń basshysy Sholpan Qadyrova qashyqtan oqytý kezinde qorytyndy attestattaý qalaı júrgiziletinin aıtty.
«9 (10) synyp oqýshylary úshin bitirý emtıhandary men 11 (12) synyp oqýshylarynyń memlekettik emtıhandary toqtatyldy. Qorytyndy baǵalar jyldyq baǵalar negizinde qoıylady. Sondaı-aq IV toqsanda bólim úshin jıyntyq baǵalaý bir ret (4-11 mamyr 2020 j.) ótedi. Toqsan boıynsha jıyntyq baǵalaý bir ret (18-22 mamyr 2020 j.) ótedi», – dep túsindirdi Sh.Qadyrova.
Bul rette Ulttyq biryńǵaı testileýdi (UBT) ótkizý formaty ózgermeıdi.
«Bıyl túlekter UBT-ny 11-shi synyptyń tórtinshi toqsanynyń baǵdarlamasyndaǵy suraqtarsyz tapsyrady (ıaǵnı 5-shi synyptan 11-shi synyptyń úsh toqsanyna deıin). Testilenýshiler arasyndaǵy qashyqtyq ulǵaıtylady. Sonymen qatar, barlyq oqýshylardyń temperatýrasyn jergilikti jerlerde tekseretin bolady. Qosymsha sanıtarlyq shekteý sharalary qabyldanady», – dedi ol.
Mektep túlekteriniń UBT-ǵa qatysýǵa onlaın-ótinim berýi 1 sáýirden 10 mamyrǵa deıin júrgiziledi. Elorda ákiminiń orynbasary Baqtııar Máken shekteý sharalary boıynsha oqýshylar arasynda túsindirý jumystaryn júrgizýdi jáne oqý jylyn tabysty aıaqtaý úshin qajetti sharalar qabyldaýdy tapsyrdy.
